Rabitə Nazirliyi rəhbərliyinin işi üzrə məhkəmədə

Cümə günü Ağır Cinayətlər Məhkəməsində Rabitə Nazirliyinin və onun strukturlarının 11 yüksək vəzifəli işçisinin işi üzrə proses davam edib.

Rabitə Nazirliyinin telefon xətlərinin çəkilməsi və təmiri ilə məşğul olan bir sıra strukturlar sistemində mənimsəmələr epizodu üzrə şahidlər ifadə veriblər.

11 müttəhimdən biri, Bakı Telefon Qovşağının rəhbəri Beytulla Hüseynov mənimsəmə  olmadığını sübut etmək istəyib: "Sadəcə sənədləri vaxtlı-vaxtında tərtib edə bilmirdik, bütün işlər isə yerinə yetirilib və burada cinayət tərkibi yoxdur", -deyə o bildirib.

 Rabitə Nazirliyinin çoxsaylı texniki strukturlarının işçiləri olan şahidlər isə saxta sənədlər tərtib edildiyini, qəsdən şişirdilmiş qiymətlərlə material alınması haqqında sənədlər imzaladıqlarını, saxta tenderlər tenderlər keçirildiyini bildiriblər.  Onlar həmçinin hər ay qeyri-rəsmi "zərf" –(paket)  şəklində əmək haqqı aldıqlarını təsdiqləyiblər.

Bu ifadələr zamanı şahidlərin əksəriyyəti ibtidai istintaqa verdikləri ifadələrindən yayınmağa çalışıblar, həmin vaxt  nə dediklərini unutduqlarını deyiblər.  

Şahidlərin bu davranışı hakim Əfqan Hacıyevin etirazına səbəb olub və hakim şahidlərin bu mövqeyini məhkəməni yanıltmaq cəhdi sayaraq buna görə cinayət məsuliyyəti nəzərdə tutulması ilə hədələyib.

Növbəti iclas dekabrın 21-də keçiriləcək.

Xatırladaq ki, nazirliyin 11 rəhbər işçisi 70 mln. manatdan çox vəsaiti mənimsəməkdə və fırıldaqçılıqda ittiham olunur. -36D-