Ramiz Mehdiyev təhsil sahəsində korrupsiya axtarır

Azərbaycan Prezident Administrasiyasının rəhbəri Ramiz Mehdiyevin sədrliyi ilə dünən Korrupsiyaya qarşı Mübarizə Komissiyasının iclası keçirilib. İclasda təhsil sahəsinə xüsusi diqqət yetirilib.

Mehdiyev qeyd edib ki, bu sahədə həm idarəetmənin təşkili, həm də tədrisin keyfiyyəti ilə bağlı problemlər var.

Komissiya sədri dekanatların məsuliyyətinin artırılması, kafedraların, müdafiə şuralarının fəaliyyəti, dərsliklərin keyfiyyətinin aşağı olması, universitetlərin saytlarının elektron kitabxanalarının aşağı səviyyədə olması məsələlərinə toxunub. Mehdiyev tədrisin keyfiyyətinin yüksəldilməsi üzrə təxirəsalınmaz tədbirlər görülməsi zərurətini qeyd edib.

Ali məktəb müəllimlərinin əmək haqqının artırılması haqqında fikrini bildirən komissiya sədri vurğulayıb ki, ödənişli təhsidlən daxil olan vəsait hesabına müəllimlərin əmək haqqına əlavələr edilməsi üzrə vahid qaydalara ehtiyac var. 

Mehdiyev həmçinin universitetlərdə fəaliyyət göstərən tələbə gənclər təşkilatlarının fəaliyyətinə toxunaraq, gənclərin nüfuzlu nümayəndələrinin təşkilatların rəhbərliyinə cəlb edilməsi və onların fəaliyyətinin genişləndirilməsi üçün zəruri şəraitin yaradılmasının əhəmiyyətini qeyd edib.

O, başqa universitetlərdən tələbələrin köçürülməsi və təkrar (ikinci) ali təhsil faktları ilə bağlı ciddi narazılığını bildirib.

İclasda iştirak edən baş prokuror Zakir Qaralov təhsil sahəsində korrupsiya və digər neqativ hallarla bağlı vətəndaşlardan gələn müraciətlər haqqında məlumat verib.

2010-2012-ci illərdə prokurorluq 536 müraciətə baxıb, 72 cinayət işi təhqiq edilib, bir sıra hallarda təxirəsalınmaz operativ tədbirlər həyata keçirilib, təqsirkarlar cinayət yerində saxlanılıb.

Çıxış edən təhsil naziri Misir Mərdənov 2010-2011-ci tədris ilindən etibarən ali təhsil sahəsində tətbiq edilən yeni maliyyələşdirmə mexanizminin məqsədləri haqqında danışıb.

Bu, maliyyə vəsaitlərinin ayrılmasında şəffaflığı təmin etməyə imkan verib. Müəllimlərin işə qəbuluna toxunan nazir prosesin şəffaf və obyektiv həyata keçirildiyini qeyd edib.

2012-ci ildə Təhsil Nazirliyinə 7156 şikayət daxil olub, onlardan 1734-ü təmin edilib, 1924 şikayət üzrə müvafiq izahatlar verilib, 1247 müraciətlə bağlı tabeli təşkilatlara tapşırıq verilib, 2251 müraciət əsassız olub.

Nazir qeyd edib ki, ali təhsil müəssisələrinə qəbul imtahanlarının şəffaflığı və obyektivliyi xeyli artıb, şikayətlərin sayı azalıb.

İclasın yekunlarına görə müvafiq qərarlar qəbul edilib, deyə Korrupsiyaya qarşı Mübarizə Komissiyasının rəsmi məlumatının sonunda bildirilir. -06D-