RATİ Avropa Şurasını İlqar Məmmədovun və Tofiq Yaqublunun mühakimə olunmasına reaksiya verməyə çağırıb

Reportyorların Azadlıq və Təhlükəsizlik İnstitutu(RATİ) Müsavat Partiyasının sədr müavini Tofiq Yaqublunun və Respublikaçı Alternativ (REAL) Hərəkatının sədri İlqar Məmmədovun azadlıqdan məhrum edilməsi barədə məhkəmə qərarını pisləyib.

“İlqar Məmmədovun və Tofiq Yaqublunun azadlıqdan məhrum edilməsi Azərbaycanın Avropa Şurası Nazirlər Komitəsinə sədrliyi ərəfəsində ölkənin imicinə daha bir ləkədir”, - RATİ-nin bəyanatında deyilir.

Martın 17-də Şəki Ağır Cinayətlər Məhkəməsi  İlqar Məmmədovu və  Tofiq Yaqublunu İsmayıllı iğtişaşlarının təşkilində təqsirli bilərək onları  7 il və 5 il müddətinə azadlıqdan məhrum edib. RATİ Apellyasiya Məhkəməsini bu qərarı ləğv etməyə və onları dərhal azad etməyə çağırır.

RATİ Avropa Şurasını və quruma üzv dövlətləri Azərbaycanda insan hüquqları sahəsində yaranmış böhrana biganə yanaşmamağa,  ölkədə insan hüquqları və fundamental azadlıqların ciddi və davamlı şəkildə pozulmasını pisləməyə çağırır.   

Avropa Şurası Parlament Assambleyası öz öhdəliklərini yerinə yetirməyən üzv dövlətlərə qarşı daha sərt mövqe tutmalıdır. Əgər üzv dövlətlərin kobud hüquq pozuntuları və Avropa Şurası qaydaları və müqavilələrinə əməl etməməsinə göz yumulursa, təşkilat bununla öz hörmətini və nüfuzunu itirir, - bəyanatda qeyd olunur. —06D-