Real TV üç əməkdaşı ilə müqavilə imzalamayıb

Bakı/18.02.20/Turan: Real TV-nin əməkdaşları Ləman Ələşrəfqızı, Afət Telmanqızı və İlqar Mikayıloğlu işdən uzaqlaşdırılıb. Bu barədə sosial şəbəkələrdə məlumatlar yayılıb.

Ləman Ələşrəfqızı və Afət Telmanqızı fevralın 9-da keçirilən növbədənkənar parlament seçkilərində  deputatlığa namizəd olub. Hər iki jurnalistin namizəd olduğu seçki dairəsi üzrə lider namizəd iqtidarda olan Yeni Azərbaycan Partiyasının üzvüdür.

Jurnalistlər televiziya rəhbərliyinin onlara seçkilərin saxtalaşdırılması ilə bağlı sosial şəbəkələrdə yazdıqlarını silməsini təklif edib. Bu zaman hər iki jurnalist buna etiraz edib. Beləliklə, televiziya rəhbərliyi jurnalistlərlə müqavilə imzalamaqdan imtina edib.

Ləman Ələşrəfqızı seçkidə namizəd kimi iştirak etməyə qərar verdiyi vaxt televiziyadakı müqaviləsinə xitam verildiyini bildirib.

“Rəhbərlik müqavilənin vaxtını uzatmaqda maraqlı olmadı və mənimlə işləməyi arzulamadı. Televiziya rəhbərliyi bizi istəmirsə, biz də orada işləməyi istəmirik”, deyə o qeyd edib. 

Afət Telmanqızı isə meydan.tv saytına bildirib ki, məsələ onun üçün qapanıb.

“Əlbəttə, qarşı tərəf deməyəcək ki, işdən azad ediblər. Özlərinə haqq qazandırmaq üçün başqa nə deyə bilərlər? Ona görə nə istəyirlər yazsınlar”.

Telmanqızı sosial şəbəkədə seçki saxtakarlığına etiraz etdikləri üçün işdən çıxarıldıqlarını deyib.

“Qarşımızda şərt qoyuldu. Sosial şəbəkədə yazdıqlarımızı silməli, ya da işdən çıxmalıydıq. Biz də işdən çıxmağı seçdik. Təhdidlə şərt qoymuşdular. Biz isə yazdıqlarımızı silməməyi üstün tutduq. Biz dövlətə qarşı hansısa pis iş tutmamışıq. Sadəcə seçkidə baş verən qanun pozuntuları ilə bağlı faktları ictimailəşdirmişik. Mən və Ləman xanım 9 fevral seçkilərinə namizəd kimi qatılmışdıq. İlqar Mikayıloğlunun isə xanımı namizəd idi. İndi necə ola bilər ki, orada baş verən qanun pozuntuları barədə danışmayaq? Bu, həm də jurnalist kimi bizim borcumuzdur”, deyə Afət Telmanqızı qeyd edib.

Öz növbəsində, real.tv saytı bildirib ki, KİV-lərdə və sosial şəbəkələrdə Milli Məclisə seçkilərlə bağlı tutduqları mövqelərinə görə Real TV-nin bəzi əməkdaşlarının işdən kənarlaşdırıldığına dair müxtəlif mülahizələr yayılır. “Milli Məclisə seçkilərə qatıldıqlarına görə, Azərbaycan qanunvericiliyinin tələblərinə uyğun olaraq, Real TV-nin əməkdaşları Afət Məhərrəmova (Telmanqızı) və Ləman İsmayılova (Ələşrəfqızı) ilə xidməti müqavilə uzadılmayıb. Seçki prosesi başa çatdıqdan sonra həmin şəxslərə öz işlərinə qayıtmaq təklif olunub. Onların telekanalda fəaliyyətlərini davam etdirməsi üçün heç bir məhdudiyyət tətbiq olunmayıb”, deyə televiziya bildirib.

Real TV-nin açıqlamasında işdən çıxarıldığı bildirilən İlqar Mikayıloğlu barədə hər hansı məlumat yer almır.

Afət Telmanqızı 125 saylı Zəngilan-Qubadlı seçki dairəsindən, Ləman Ələşrəfqızı isə 117 saylı Oğuz-Qəbələ seçki dairəsindən deputatlığa namizəddir.

İlqar Mikayıloğlunun həyat yoldaşı Zülfiyyə Bayramova 81 saylı Beyləqan Seçki Dairəsindən namizədliyini irəli sürüb. -0-