Rəsmi Bakı hələlik Dağıstanda ölkə vətəndaşlarının həlak olması ilə bağlı şərh vermir

Azərbaycan hakimiyyəti hələlik avqustun 18-də Dağıstanın Xasavyurt şəhərində İmam Əli məscidində terror aktı zamanı vətəndaşlarının həlak olması ilə bağlı heç bir şərh vermir. Xatırladaq ki, silahlı basqın zamanı 1 Azərbaycan vətəndaşı – Astara rayonunun Pensər kənd sakini 17 yaşlı Elmin Elxan oğlu Cəfərov həlak olub, 7-si isə yaralanıb. Yaralananlar Xasavyurtda müalicə olunur.

Hücum əsasən Dağıstanda işləyən Azərbaycan vətəndaşlarının ziyarət etdiyi bu şiə məscidində bayram iftarı zamanı həyata keçirilib. 

Dağıstanın hüquq-mühafizə orqanları araşdırma aparır.

Bu mövzu İnternet istifadəçiləri tərəfindən fəal şəkildə müzakirə olunur. Çoxları hücumun vəhhabi qruplaşmaları tərəfindən dini dözümsüzlük zəminində təşkil edildiyi qənaətindədirlər. Bu qruplar şiələri kafir və imansız hesab edir.

Dağıstanda dini zəmində qarşıdurmalar tez-tez olur, lakin ilk dəfə Azərbaycan vətəndaşları silahlı hücumun qurbanı oldular.

Eyni zamanda, qeyd etmək lazımdır ki, indiyədək Azərbaycanın hüquq-mühafizə orqanları Şimali Qafqazdan dini ekstremizmin “ixracı” cəhdlərinin qarşısını alırdılar. 2008-ci ilin avqustunda Əbu-Bəkr məscidinə silahlı hücumu nəzərə almasaq, Azərbaycanda Şimali Qafqaz və beynəlxalq terror şəbəkəsi ilə bağlı ciddi rezonans doğuran cinayətlər törədilməyib. -06D-