Rəsul Cəfərov AİHM-i Dilqəm Əsgərov və Şahbaz Quliyevin işinə prioritet qaydada baxmağa çağırıb

Təcridxanada saxlanılan hüquq müdafiəçisi Rəsul Cəfərov “Qurbanların səsi” kampaniyası çərçivəsində Avropa İnsan Hüquqları Məhkəməsinə müraciət edərək ermənilər tərəfindən həbs olunmuş Kəlbəcər sakinləri Dilqəm Əsgərov və Şahbaz Quliyevin  işinə prioritet qaydada baxmağa çağırıb.

Müraciətdə qeyd olunur ki, onların azadlıqdan məhrum edilməsi beynəlxalq humanitar hüquqa ziddir.

Həbsdə olan Rəsul Cəfərov 1990-cı il 20 yanvar hadisələrinin 25-ci ildönümü ərəfəsində “Qurbanların səsi” kampaniyasına təşəbbüs göstərib.

* İnsan Hüquqları Klubunun rəhbəri, “Demokratiya naminə incəsənət” kampaniyasının koordinatoru Rəsul Cəfərov avqustun 2-də həbs olunub. O, qanunsuz sahibkarlıq, vəzifə səlahiyyətindən sui-istifadədə ittiham olunub.  Sonradan ona qarşı yeni ittihamlar-  vəzifə saxtakarlığı (CM-in 313-cü maddəsi)və mənimsəmə (179.3.2) ittihamları irəli sürülüb.  

Amnesty İnternational Rəsul Cəfərovu”vicdan məhbusu” kimi tanıyıb. —06D-