Rəsul Cəfərovun barəsində hökmdən Avropa İnsan Hüquqları Məhkəməsinə şikayət veriləcək (YENİLƏNİB)

Hüquq müdafiəçisi Rəsul Cəfərovun barəsində beş maddə üzrə ittihamın hüquqi əsası yoxdur, onun hərəkətlərində cinayət tərkibi olmayıb. Bu barədə hüquq müdafiəçisinin vəkili Fariz Namazlı bu gün Ali Məhkəmədə R.Cəfərovun kassasiya şikayətinə baxılması zamanı bildirib.

Belə ki, R.Cəfərov fiziki şəxs kimi qrant müqavilələri çərçivəsində layihələrin reallaşması ilə bağlı vergiləri ödəyib.

R.Cəfərovun pul mükafatı kimi aldığı vəsait və ezamiyyət xərcləri də qrantlara aid edilib.

Bundan əlavə, birinci instansiya məhkəmə Maliyyə Nazirliyi, Vergilər Nazirliyi və QHT-lərə Dövlət Dəstəyi Şurasının nümayəndələrindən ibarət yoxlama komissiyasının aktını yolverilməz sübut kimi iş materialları sırasından çıxarmayıb. Onların R.Cəfərovun layihələrinin təftiş edilməsi üçün səlahiyyətləri olmayıb.

İstintaq R.Cəfərovun dövlət qeydiyyatı olmayan İnsan Haqları Klubunun rəhbəri kimi fəaliyyətini qanunsuz sahibkarlıq kimi tövsif edib.

İttiham tərəfinin fikrincə, bununla da R.Cəfərov qanunsuz olaraq qrantlar reallaşdırıb, gəlir əldə edib.

Əslində Azərbaycan qanunvericiliyi dövlət qeydiyyatı olmayan QHT-lərin fəaliyyətini qadağan etməyib. Bu barədə Azərbaycan hökuməti “İsmayılov AİHM-də Azərbaycana qarşı” işi üzrə bəyan edib. Bunu həmçinin QHT-lərə Dövlət Dəstəyi Şurasının rəhbəri Azay Quliyev də deyib.

Digər tərəfdən, istintaqın zərərçəkən  kimi tanıdığı şəxslər məhkəmədə bildiriblər ki, özlərini zərərçəkən hesab etmirlər və gördükləri işə görə nəzərdə tutulan vəsaiti alıblar.

Bununla yanaşı donorlar rəsmi məktublarla R.Cəfərova qarşı iradlarının olmadığını bildiriblər.

Bundan əlavə, müdafiə tərəfinin bir çox vəsatəti aşağı instansiyalar tərəfindən qəbul edilməyib.

R.Cəfərov özü də ittihamların əsassız olduğunu bildirib.

O qeyd edib ki, qrantlar üzrə bütün əməliyyatlar bank sistemi vasitəsilə şəffaf həyata keçirilib.

R.Cəfərov deyib ki, qanunvericilik qeydiyyatda olmayan QHT-nin rəhbəri kimi onun qrant layihələrini həyata keçirməsinə icazə verir. Qanun fiziki şəxslərdən qrantların qeydiyyatını tələb etmir.

2014-cü ilin əvvəlində yeni qanun qüvvəyə minəndə R.Cəfərov dövlət qeydiyyatı olan QHT vasitəsilə layihələri həyata keçirməyə başlayıb.

O, məhkəməni ədalətli bəraət hökmü çıxarmağa çağırıb.

Hakim Fərhad Kərimov hüquq müdafiəçisinin səfərlərinin nəyə görə donorlar tərəfindən ödənilməsinin səbəbləri, R.Cəfərovun həqiqətən də ezamiyyətdə olmasını təsdiq edən sübutların olması ilə maraqlanıb. Bu, hakimə çox təəccüblü gəlib. Qeyd edib ki, onun fəaliyyətinin  bu formada maliyyələşdirilməsini təsəvvür etmir.

Buna cavab olaraq R.Cəfərov hakimə deyib ki, əgər o da QHT fəalı olsaydı onun da səfərləri donorlar tərəfindən maliyyələşdirilərdi.

R.Cəfərov deyib ki, beynəlxalq konfranslarda iştirakına dair sübutları təqdim edib. “ATƏT-in KİV azadlığı üzrə konfransında 50 dövlətin nümayəndəsi iştirak edib. Mənim orada iştirakımı necə inkar etmək olar?”, - o vurğulayıb.

Lakin dövlət ittihamçısı Apellyasiya Məhkəməsinin qərarının qüvvədə saxlanmasını təklif edib.

Kiçik məşvərətdən sonra məhkəmənin qərarı qüvvədə saxlanılıb.

Müdafiə tərəfi Avropa İnsan Hüquqları Məhkəməsinə şikayət vermək niyyətindədir.

R.Cəfərovun qanunsuz həbslə bağlı birinci şikayəti üzrə kommunikasiya artıq başa çatıb.—06C--

2016 Fevral 16 (Çərşənbə axşamı) 12:10:31

  Bu gün Ali Məhkəmə   hüquq müdafiəçisi Rəsul Cəfərovun kassasiya şikayətini təmin etməyib. Hakim Fərhad Kərimov Apellyasiya Məhkəməsinin qərarını qüvvədə saxlayıb. Bu barədə Turan-ın müxbiri məhkəmə zalından məlumat verib. Onun sözlərinə görə, R.Cəfərov prosesdə iştirak edib.

2015-ci il iyulun 31-də Bakı Apellyasiya Məhkəməsi həbsdə olan hüquq müdafiəçisi R. Cəfərovun barəsində hökmü dəyişdirib. O, vergi borcunu ödədiyi üçün vergidən yayınma  ittihamı götürülüb.Sonra məhkəmə həbs cəzasını üç ayadək azaldıb -  6 il 3 aya endirib.

R.Cəfərov 2014-cü il  avqustun 2-də qanunsuz sahibkarlıq, vergidən yayınma və vəzifə səlahiyyətlərindən sui-istifadə ittihamları ilə həbs olunub.

R.Cəfərov bu ittihamları qəbul etmir və həbsini siyasi sifariş sayır.

Amnesty İnternational onu “vicdan məhbusu” kimi tanıyıb.

Rəsmi Bakı R.Cəfərov və digər siyasi məhbusların azadlığa buraxılmasını tələb edən Avropa  Şurası və başqa beynəlxalq təşkilatların çağırışlarına məhəl qoymayıb.-16/06D-