Rəsul Cəfərovun həbs müddəti üç ay azaldılıb

Bu gün Bakı Apellyasiya Məhkəməsi hüquq müdafiəçisi Rəsul Cəfərovun apellyasiya şikayətinə baxıb.

Vəkil Fariz Namazlı Cəfərovun vergi borcunun ödənməsi haqqında sənəd təqdim edib və vergi ödənişindən yayınmaya görə cəzanın – 1 il azadlıqdan məhrumetmə cəzasının ləğv edilməsi barədə vəsatət qaldırıb.

Digər vəkil Əlibaba Rzayev bütün ittihamların əsassız olduğunu bildirib və Cəfərovun cinayət təqibinə son qoyulması, ona bəraət verilməsi və azad edilməsi haqqında vəsatət qaldırıb.

O qeyd edib ki, Cəfərova qarşı bütün ittihamlar qeydiyyatsız qrant layihələrinin həyata keçirilməsi iddialarına əsaslanıb, bu, qanunsuz sahibkarlıq, mənimsəmə və vergi ödənişindən yayınma kimi qiymətləndirilib.

“Bu, cəfəngiyyatdır, çünki qanunsuz sahibkarlıq olsaydı, qanunsuz gəlirlərə necə vergi düşə bilərdi?

Qeydiyyatsız qrantların həyata keçirilməsi yalnız 2014-cü ildən qanunsuz olub, buna qədər isə Cəfərov qrant almayıb. Buna görə ona qarşı bütün ittihamlar əsassızdır”, deyə Rzayev bildirib.

İstintaqın və məhkəmənin zərərçəkmiş kimi qəbul etdiyi şəxslərə gəlincə, onlar özlərini bu statusda görmədiklərini bildiriblər və hətta bununla bağlı apellyasiya şikayəti veriblər.

Cəfərov özü bildirib ki, o, vergi borcunu özünü təqsirli bildiyi üçün ödəməyib. Bu, hakimiyyətlə dialoqa doğru addım idi, deyə o bildirib.

Qrantların həyata keçirilməsinə görə nəzarəti donorlar özləri həyata keçirirdi, onların əksəriyyətinin Bakıda ofisləri var idi. Amma istintaq onların fikri ilə heç maraqlanmayıb.

Qısa sürən müşavirədən sonra məhkəmə cəza müddətini üç ay – 6 il üç aya qədər uzatmaq qərarı qəbul edib.

* Cəfərov 2 avqust 2014-cü ildə həbs edilib. Ona qarşı AR CM-in 192 (qanunsuz sahibkarlıq), 213 (vergi ödənişindən yayınma) və 308-ci (vəzifə səlahiyyətlərindən sui-istifadə) maddələri ilə ittiham irəli sürülüb. Sonradan onu həm də mənimsəmə və vəzifə saxtakarlığında ittiham ediblər.

Amnesty İnternational beynəlxalq hüquq müdafiə təşkilatı onu “vicdan məhbusu” hesab edir. Hökm elan edildikdən sonra Cəfərov bildirib ki, onu saxta və siyasi sifariş hesab edir. Məhkəmə hüquq müdafiəçisinin hər-hansı təqsirini sübuta yetirməyib. İttiham tərəfin bütün şahidləri hüquq müdafiəçisinin xeyrinə ifadə veriblər, proses özü faktiki olaraq onun tamamilə təqsirsiz olduğunu sübuta yetirib. Beynəlxalq təşkilatlar, o cümlədən Avropa Şurası, Avropa İttifaqı və başqaları çoxsaylı bəyanatlarında və çağırışlarında Azərbaycan hakimiyyətini Cəfərovu və uydurma ittihamlarla həbs edilmiş digər hüquq müdafiəçilərini azad etməyə çağırıb. -06B-