Saatlı rayon sakini polis şöbəsində fiziki təzyiqə məruz qaldığını iddia edir

Bakı/15.04.23/Turan: Saatlı rayonun Dədə Qorqud kənd sakini Abasov Cavanşir polis şöbəsində fiziki təzyiqə məruz qaldığını iddia edir.

Onun sözlərinə görə, aprelin 14-də həyətindən bir baş quzu heyvanı oğurlanmışdır. "Axşam mən də 102 xidmətinə şikayət etdim. Gəlib baxış keçirdilər və məni Saatlı Rayon Polis Şöbəsinə apardılar. Orda mənim döş qəfəsimə və çənə nahiyəmə yumruğ zərbələri yendirdilər, təhqir etdilər. Döyməynin səbəbi odur ki, sən 102 xidmətinə niyə zəng etmisən?"

C.Abasovun sözlərinə görə, şöbədə ona məcbur quzunun itməməsi kimi ərizə yazdırdılar. 

DİN-in Mətbuat Xidmətinin Şirvan regional qrupunun baş inspektoru, polis kapitanı Nizam Həmidov məsələ ilə bağlı Turana bildirib ki, Saatlı rayonunun Dədə Qorqud kənd sakini C.Abasov aprelin 14-də DİN-in "102" xidmətinə zəng edərək bir baş xırdabuynuzlu heyvanının oğurlanması barədə məlumat verib. "Bir neçə saat sonra isə vətəndaş polis şöbəsinə yaxınlaşaraq xırdabuynuzlu heyvanını tapdığını və heç bir şikayətinin olmadığını bildirib. 

Vətəndaş C.Abasovun polis əməkdaşları barədə irəli sürdüyü iddialar əsassızdır və həqiqəti əks etdirmir".—21В-