Şahmar Mövsümovla görüşdə QHT Koalisiyası üzvlərinin üçdə bir hissəsi iştirak edib

Ötən gün Mədən Sənayesində Şəffaflıq Təşəbbüsləri (MSŞT) üzrə hökumət komissiyasının rəhbəri, Dövlət Neft Fondunun direktoru Şahmar Mövsümovun yanında mədən sənayesində şəffaflığın artırılması üzrə QHT Koalisiyası daxilində vəziyyət müzakirə edilib.

Koalisiyanın koordinatoru Qubad İbadoğlu Turan-a bildirib ki, görüşdə Koalisiyanın 160 üzvünün üçdə bir hissəsi iştirak edib. Bunlar əsasən hökumətyonlü QHT-lərdir.

“Hətta Neft Fondunun əməkdaşlarını və Koalisiyaya aidiyyatı olmayan şəxsləri də nəzərə alsaq, iştirakçıların sayı 50 nəfərdən çox olmazdı”, - Q.İbadoğlu bildirib.

Q.İbadoğlu toplantıda MSŞT beynəlxalq İdarə Heyətinin nümayəndəsi kimi iştirak edib.

Xatırladaq ki, bundan öncə Koalisiya Şurası belə görüşün əleyhinə çıxaraq bunu hökumətin müdaxiləsi kimi qiymətləndirib.

Ş.Mövsümov bildirib ki, hökumət Koalisiyanın işinə müdaxilə etmək istəmir, sadəcə, MSŞT üzrə çoxtərəfli qrupda (qrupda vətəndaş cəmiyyəti, hökumət və mədən şirkətlərinin nümayəndələri iştirak edirlər) təmsilçilik ətrafında mübahisə ilə bağlı vəziyyəti nizamlamaq istəyir.

“Əslində heç bir problem yoxdur. Koalisiya Şurası səs çoxluğu ilə çoxtərəfli qrupun 3 əsas və 3 ehtiyat üzvünü seçib. Şuranın 11 üzvündən 6-ı bunun lehinə səs verib. Azlıqda qalan beş nəfər hökumətin mövqeyindən çıxış edərək bununla razılaşmır və onların mövqeyi Koalisiyanın nizamnaməsinə ziddir”, - Q.İbadoğlu vurğulayıb.

Onun sözlərinə görə, iclas iştirakçıları digər QHT-lərin birləşdirilməsi hesabına Koalisiyanın genişləndirilməsini təklif ediblər. Ancaq bu 2014-cü ildə Koalisiya, hökumət və şirkətlər tərəfindən imzalanmış memoranduma ziddir.

Ş.Mövsümov deyib ki, əgər Koalisiya çoxtərəfli qrupun tərkibi ilə bağlı razılığa gələ bilməsə iclasa Koalisiyanın bütün üzvləri dəvət olunacaq ki, bu da memoranduma ziddir.

Q.İbadoğlunun sözlərinə görə, məsələ açıq qalıb. Yaxın vaxtlarda Koalisiya Şurası vəziyyəti müzakirə edərək qərar qəbul edəcək.

Öz növbəsində, QHT Koalisiya Şurasının üzvü Əliməmməd Nuriyev Şahmar Mövsumovun Çoxtərəfli Qrupda QHT-lərin təmsil olunması ilə bağlı fikir ayrılıqlarının tənzimlənməsi üzrə ideyasını dəstəkləyib.

Nuriyev hesab edir ki, Çoxtərəfli Qrupda “bir qrupun” nümayəndələri deyil, QHT-lərin geniş spektri iştirak etməlidir. O iddia edir ki, Qubad İbadoğlu və Oqtay Gülalıyevin şəxsində bu qrup “Azərbaycanı MSŞAT-dən çıxartmağa çalışır”.

Nuriyev Mövsumovun tərəflər çoxtərəfli qrupun QHT-lərdən olan üzvləri ilə bağlı razılıq əldə etməyəcəyi təqdirdə qrupun iclasına bütün koalisiya üzvlərinin buraxılması barədə təklifini doğru hesab edir.

Onun sözlərinə görə, koalisiyada real olaraq 70 QHT fəaliyyət göstərir, bunun 50-si dünən Mövsumovla görüşdə iştirak edib.

ARDNF-in iclas barədə məlumatında deyilir ki, görüşdə 50 QHT-nin nümayəndələri iştirak ediblər.

Qeyd olunur ki, görüş müxtəlif maraqlar qrupunun nümayəndələrini bir masa arxasına toplamaq üçün keçirilıib

“Görüşdə əsas məqsəd açıq dialoq üçün şəraitin yaradılması, çoxtərəfli qrupda təmsilçiliklə bağlı fikir ayrılıqlarının müzakirəsi üçün platformanın təşkilidir”, - məlumatda deyilir.  

Məlumatda müzakirələrin yekunları açıqlanmır.-06B--