SDİ: Tofiq Yaqublunun barəsində hökm ölkədə hüquqi özbaşınalığın parlaq sübutudur

Bakı/03.09.20/Turan: Tofiq Yaqublunun bütün hüquq normalarına və müdafiə dəlillərinə məhəl qoyulmadığı məhkəmə prosesi Azərbaycan Respublikasında tam hüquqi özbaşınalığın parlaq sübutudur. Bu barədə Sülh və Demokratiya İnstitutunun direktoru Leyla Yunusun bəyanatında deyilir.

Hazırda Azərbaycanda 191 siyasi məhbus var. Amansız repressiyaların yeni dalğası 2020-ci ilin yazında prezident İlham Əliyevin martın 19-da etdiyi çıxışdan sonra başlayıb. O, müxalifəti “xalq düşməni” və “beşinci kolon” adlandıraraq onunla haqq-hesab çəkməyə çağırıb.

Artıq martın 23-də həmin Nəriman Mehdiyev Azərbaycan Respublikasının milli qanunvericiliyinin və beynəlxalq hüququn bütün normalarını pozaraq T.Yaqublunu həbsxanaya saldı.

Sözsüz ki, Avropa İnsan Hüquqları Məhkəməsi Tofiq Yaqublunun barəsində hökmü qanunsuz, Avropa Konvensiyasının maddələrini pozmuş hesab edir.

“Tofiq Yaqublu 2020-ci ildə repressiyaların ilk qurbanıdır. Hakimiyyət pandemiya dövründə növbəti repressiv kampaniyasını müxalifətin ən nüfuzlu liderindən başlayıb. 2020-ci ilin mart-avqust aylarında müxalifətin 43 fəalına qarşı cinayət ittihamları saxtalaşdırılıb.

Biz Azərbaycan xalqını və beynəlxalq birliyi Azərbaycanın ən yaxşı övladlarından biri Tofiq Yaqublunun azadlığı uğrunda mübarizəyə başlamağa çağırırıq”, - bəyanatda deyilir. -02D-