Səbayel rayon icra başçısının oğlu 5,5 il müddətinə həbs olunub

Bu gün Bakı Ağır Cinayətlər Məhkəməsində “Mc Donald's” Bakı nümayəndəliyinin rəhbəri Maqsud Mirzəyevin oğlu Sənan Mirzəyevin yol qəzasında həlak olması ilə bağlı proses başa çatıb.

Məhkəmə iş üzrə İlham Əsgərli və Əhliman Süleymanovu təqsirli bilərək onları 5,5 və 6 il müddətinə azadlıqdan məhrum edib.

Xatırladaq ki, S.Mirzəyev 2014-cü il sentyabrın 29-da avtomobil qəzası zamanı həlak olub. Zıx-Aeroport şossesində İ.Əsgərlinin idarə etdiyi “Mercedes S500” avtomobili Əhliman Süleymanovu idarə etdiyi “Howo” yük maşını ilə toqquşub.  Həmin vaxt S.Mirzəyev və P.Fətullayev (sürücü, sükanı İlhama verib) avtomobildə olublar.

S.Mirzəyev bir müddət sonra xəstəxanada ölüb. P.Fətullayev və İ.Əsgərli yaralanıblar. Müalicədən sonra ev həbsinə alınıblar.

Şahid ifadələrindən məlum olub ki, “Mersedes”   180-200 km/s sürətlə hərəkət edib və ötüb keçmək istərkən yük maşını ilə toqquşub.

Qeyd edək ki, S.Mirzəyev zəif təchiz edilmiş Sabunçu xəstəxanasına, Səbayel rayon icra başçısının oğlu  İ.Əsgərli isə Mərkəzi Kliniki Xəstəxanaya aparılıb.

S.Mirzəyevi aparan “təcili yardım” maşını kəllə-beyin xəsarəti alan Sənan üçün çox vacib olan süni nəfəs aparatı ilə təchiz olunmayıb.

Mərhumun atası M.Mirzəyev bildirib ki, rayon rəhbəri öz oğlunu xilas etməklə məşğul olub, Sənana yardım göstərmək üçün heç bir iş görməyib. Qəza baş verən gün M.Mirzəyev xarici ölkədə səfərdə olub.

Bir sualın cavabı qalır: Səbayel rayon icra başçısı nə zaman istefa verəcək yoxsa öz kreslosunda əyləşməyə davam edəcək?0—