Separatçılar Sərsəng su anbarından birgə istifadə etməyi təklif edirlər

Yerevan/14.08.13/Turan-Armİnfo: Qarabağın “baş nazir müavini” Artur Aqabekyan su resurslarının birgə idarə edilməsi məsələsində Azərbaycanla dialoqa başlamağa hazır olduğunu bildirib. “Azadlıq” radiosuna müsahibəsində o, söhbətin Sərsəng su anbarından və Tərtər çayının suyundan getdiyini deyib.

“Sərsəng su anbarının imkanları bizim istifadə etdiyimizdən daha çoxdur və hələ sovet vaxtında tikilmiş su kanallarından düzgün istifadədən təkcə Ermənistan tərəfi deyil, Azərbaycan tərəfi də udacaq”, deyə o qeyd edib.

“Sərsəng su anbarının sularından elektrik enerjisinin istehsalı üçün istifadə edərək, biz öz maraqlarımıza uyğun qrafik seçirik, amma dialoq baş tutarsa, biz hər iki tərəfin maraqlarını nəzərə ala bilərik. Suayırıcının ən mühüm nöqtəsi Tərtər rayonu ərazisindədir və dialoq baş tutarsa, biz bu suayırıcı stansiyasından düzgün istifadə edərək, Azərbaycan tərəfə də su verə bilərik”, deyə Aqabekyan qeyd edib.

“Nə qədər olmasa, bu, qonşu ölkədir, bu gün o, düşməndir, sabah sadəcə dost olmayan ölkə olacaq və biz zaman keçdikcə xalqları sülhə hazırlamalıyıq”, deyən Aqabekyan qeyd edib ki, Qarabağ tərəfi həmişə istənilən sərhədyanı əməkdaşlığa hazırdır.

Rəsmi Bakı hələlik bu bəyanata reaksiya verməyib. Bakının mövqeyi ondan ibarətdir ki, Qarabağ münaqişəsi tənzimlənməyənə qədər separatçılarla heç bir əməkdaşlıq olmayacaq. -02D-