Şeremetyevo aeroportunda Azərbaycan vətəndaşından 2,7 milyon dollar oğurlanıb

Ötən gün səhər Moskvanın  Şeremetyevo aeroportunda silahlı qarət baş verib.

Life News bildirir ki, qarətçilərin qurbanı 31 yaşı azərbaycanlı Zaur Qədimov olub. O, səhər saat altıda böyük məbləğdə pul ilə İstanbuldan gəlib.

D terminalının dayanacağında onu özəl mühafizə agentliyinin əməkdaşları gözləyiblər. 

Lakin saat 7:00-da qara geyimli, maskalı, avtomatla silahlanmış bir neçə adam mühafizəçilərin əllərini qandallayıblar və  aerovağzalın binasından çıxan Z.Qədimovun əlindən çantasını alıblar. Bu barədə DİN Nəqliyyatda Polis İdarəsinin mətbuat xidməti bildirib.

Mənbə  Life News-a bildirib ki, hücum edənlər on nəfər olub. Onlar sərnişini gözləyən mühafizəçilərə polis əməkdaşlarının vəsiqələrini göstərərək onların ardınca gəlmələrini tələb ediblər və mikroavtobusa əyləşdirərək uzaqlaşdırıblar. 

Şahidlərin söylədiklərinə görə, cinayətkarların oturduğu avtomobilin nömrəsi müəyyən edilib.

Z.Qədimov özü bildirib ki, qara geyimdə və maskada olan altı nəfər terminalın çıxışında ona hücum ediblər. Avtomatla qorxudaraq onu tünd göy rəngli “Sobol” avtomobilinə oturdaraq aeroport ərazisindən çıxarıblar və içində 2,7 milyon dollar pul olan çantanı  götürüblər.  

Pulların hansı məqsədlə və nədən nağd şəkildə gətirilməsinin səbəbləri açıqlanmır.

Təsvir edilən əlamətlərə görə, soyğunçuların xüsusi xidmətin əməkdaşları olduqları ehtimal olunur. Bundan əlavə, adi qarətçilər avtomatla aeroportun ərazisində gəzə bilməzdilər.

Z.Qədimovun şəxsiyyəti, nə ilə məşğul olduğu açıqlanmır. Pulların kriminal mənşəli olması istisna edilmir, çünki bu qədər böyük pul adətən banklar vasitəsilə keçirilir.

Bu yaxınlarda Şeremetyevo aeroportunda Bişkekdən gələn başqa bir sərnişin qarət edilib. Onun üzərində 1,6 mln. dollar ilə pul olub. -02D-