Şiə ilahiyyatçı Sərdar Babayev 17 il müddətinə azadlıqdan məhrum edilib

Bakı/28.09.23/Turan:  Sentyabrın 28-də Bakı Ağır Cinayətlər Məhkəməsində şiə ilahiyyatçı Sərdar Babayevə hökm oxunub. Məhkəmə onu Azərbaycan Cinayət Məcəlləsinin 274-cü (casusluq formasında dövlətə xəyanət) maddəsilə təqsirli bilərək cəzasını ciddi rejimli koloniyada çəkməklə 17 il azadlıqdan məhrum edib. Bundan əvvəl prokuror Babayevə 18 il həbs cəzası istəmişdi.

Vəkil Cavad Cavadov Turan-a bildirib ki, Babayev özünü təqsirli bilməyib, ittihamları absurd hesab edib, ona görə də məhkəmədə ifadə verməkdən imtina edib.

Vəkilin sözlərinə görə, məhkəmə istintaqı zamanı Babayevin günahını sübut edən əsaslı və səhih sübutlar təqdim edilməyib.

Müdafiə tərəfi hökmdən Apellyasiya Məhkəməsinə şikayət vermək niyyətindədir.

Vəkil Cavadov onu da bildirib ki, sentyabrın 21-də Avropa İnsan Hüquqları Məhkəməsi Babayevin bu cinayət işi üzrə həbsilə bağlı şikayətini təmin edib. Avropa İnsan Hüquqları Məhkəməsi Babayevin 5-ci maddə (azadlıq və şəxsi toxunulmazlıq hüququ) üzrə hüquqlarının pozulduğunu etiraf edib və ona 5 min avro məbləğində təzminat ödənilməsini qərara alıb.

Bundan öncə istintaq mərhələsində Babayev bildirib ki, "ona qarşı ittihamlar saxtalaşdırılıb və o, Azərbaycan-İran münasibətlərinin pisləşməsinin qurbanı olub".

İttiham tərəfinin nümayəndələrindən şərh almaq mümkün olmayıb.

Bundan əvvəl, 2017-ci ilin iyulunda Sərdar Babayev Masallı məscidində axund olarkən dini mərasimlərin keçirilməsi tələblərini pozmaqda ittiham olunaraq üç il müddətinə azadlıqdan məhrum edilmişdi.

O zaman da hüquq müdafiəçiləri onu siyasi məhbus kimi tanımışdılar.- 06B-