Siyasi Məhbusların Monitorinqi Mərkəzi Taleh Bağırzadənin hüquqlarına əməl olunmasını tələb edir

 Siyasi Məhbusların Monitorinqi Mərkəzi “Müsəlman birliyi” Hərəkatının lideri, həbsdə olan Taleh Bağırzadənin hüquqlarının  pozulmasından narahatlığını bildirib.

Mərkəzin bəyanatında deyilir ki, T.Bağırzadə DİN Baş Mütəşəkkil Cinayətkarlıqla Mübarizə İdarəsinin təcridxanasında saxlanılır.  Lakin qanunvericiliyə görə, istintaq altında olan şəxsi onun həbsi barədə məhkəmə qərarından sonra 24 saatdan artıq polisdə saxlamaq olmaz.

“Belə güman etməyə əsas var ki, Taleh Bağırzadəyə işgəncə verilir, onun vəkillə, valideynləri ilə  görüşünə icazə verilmir ki, bu da Avropa İnsan Haqları Konvensiyasının işgəncələrin qadağan edilməsi barədə maddəsinə ziddir.

Çox güman ki, T.Bağırzadənin bədənində işgəncə izləri var və bu halda təcridxanada onu qəbul etmirlər, çünki akt tərtib edilməlidir. Bu səbəbdən də onu Penitensiar Xidmətin təcridxanasına köçürmürlər.

Biz KİV vasitəsilə baş prokurora müraciət edərək Taleh Bağırzadəyə qarşı işgəncə faktının araşdırılmasına çağırırıq”, - Mərkəzin rəhbəri Elşən Həsənov bildirib.

Xatırladaq ki, T.Bağırzadə noyabrın 26-da Nardaranda keçirilən xüsusi əməliyyatlar zamanı saxlanılıb. O, bir sıra ağır cinayətlər törətməkdə ittiham olunur. Bura hakimiyyəti ələ keçirmək və konstitusiya quruluşunu dəyişmək cəhdləri də daxildir.  T.Bağırzadə ittihamları rədd edir.—06B--