Eldar Sabiroğlu: Azərbaycanda hakimiyyətdə kimisə tənqid etmək qadağası yoxdur

Yeni Azərbaycan Partiyasının (YAP) üzvü, Müdafiə Nazirliyinin mətbuat xidmətinin keçmiş rəhbəri Eldar Sabiroğlu “Amerikanın Səsi”nə müsahibəsində oğlu Rüfət Səfərovun prokurorluq orqanlarından istefasının səbəblərindən danışıb.

Sual: Hazırda ailənizə, evinizə təzyiq varmı?

Cavab: Yox. Heç bir təzyiq yoxdur və hiss etmirəm.

Sual: Oğlunuz qeyd edir ki, evinizin qarşısında həmişə polislər olub. İnid evinziin qarşısında polislər varmı?

Cavab: İndi mənə orada polisin olduğu barədə söz deyilməyib, polis yoxdur orada. Nə üçün gəlməlidilər?

Sual: Oğlunuzun bu hərəkətini necə qiymətləndirərdiniz?

Cavab: Əlbəttə ki, mən mənfi qiymətləndirirəm. Bu addımları gərək atmayaydı.

Sual: Son saatlarda oğlunuzla danışıbsınızmı?

Cavab: Danışmışıq.

Sual: Nə deyib?

Cavab: Mənə söylədi ki, ata, bu, mənim özümün seçdiyim mövqedir və xahiş edirəm ki, müdaxilə etməyəsiniz. Cavabında bildirdim ki, axı sən düzgün etmədin. O, yenə həmin fikrini söyləmiş oldu.

Sual: Eldar müəllim son zamanlar sizə, ailənizə qarşı hansı təzyiqlər olub?

Cavab: Nə son zamanlar, nə ondan əvvəl, nə də sonra heç bir təzyiq olmayıb. Sadəcə olaraq, Ramiz Mehdiyevlə bağlı mənim verdiyim yazılar, çap etdirdiyim məqalələr informasiya məkanında, mətbuatda əks reaksiya yaradıb. Bu əks reaksiyanı da mən təbii qarşılayıram. Ancaq, bir az tərbiyəli, bir az əxlaqlı olsa idi, daha yaxşı olardı. Mənə qarşı çox mədəniyyətsiz şəkildə, böhtan dolu, təhqir dolu, ailəmə qarşı fikirlər səsləndirdilər. Oğlum da, sözün düzü, bunlara çox dözümsüz yanaşırdı. O, gəncdir, hissiyatı bir qədər fərqlidir. Belə qiymətləndirirlər ki, mən böyük qəbahətə yol vermişəm, prezident adminstrasiyasının rəhbəri Ramiz Mehdiyevi tənqid etməklə hakimiyyəti tənqid etmişəm. Daha doğrusu, yazılarımı hakimiyyətin tənqidinə həsr etmişəm. Partiyanın (YAP – red.) nizamnaməsində də, Azərbaycanda söz azadlığının verdiyi imkanlarda da belə bir göstəriş yoxdur ki, hakimiyyətdə kimisə tənqid etmək olmaz və hansı məqamda əyləşdiyindən asılı olmayaraq. Deməli, Ramiz Mehdiyevi mən tənqid edirəmsə, dövlətin əleyhinə çıxmış oluram? Xeyr, elə deyil. Dövlət başçısının əleyhinə danışmağı mən qeyri-məqbul sayıram, onun qarşısında hesabatlıyam.

Sual: Hazırda Yeni Azərbaycan Partiyasının üzvüsünüz? Partiyadan çıxarılmağınızla bağlı hər-hansı məsələ gündəlikdə yoxdur?

Cavab: Yox. Elə bir şey eşitməmişəm, yoxdur.

Sual: Oğlunuz qeyd edib ki, müxalifətə keçib. Hansı siyasi partiyanı seçib, bilirsinizmi?

Cavab: Əgər verdiyi müsahibələri izləmiş olsanız, o açıqca bildirir ki, mənim müxalif mövqeyə keçməyim o demək deyil ki, hansısa müxalifət partiyasının üzvü olmuşam. Mənim belə bir fikrim yoxdur. Müxalif mövqeli şəxs kimi fəaliyyətimi davam etdirəcəyəm və heç bir partiyaya keçmək barədə fikirləşmirəm.

Sual: Oğlunuz qeyd edib ki, atam məndən imtina da edə bilər, bu, onun öz işidir. Siz necə, oğlunuzdan imtina edə bilərsiniz?

Cavab: Siz zarafat edirsiniz? – bu, mümkün deyil.

Sual: Oğlunuza nə məsləhət bilərdiniz? Oğlunuz bildirib ki, Zərdab rayon prokuroru zəng edib, deyib ki, düzgün etmir və oğlunuzu təhqir edib. Həm də Respublika Prokurorluğundan yoxlama gözləyir.

Cavab: Xəbərim yoxdur. Bu, onların öz aralarında olan söhbətdir. Bilmirəm, nə dərəcədə mümkün olub. Onu özlərindən soruşsan, daha yaşxı olar.

Sual: İndiki anda hökumətə, üzvü olduğunuz YAP rəhbərliyinə, oğlunuza, cəmiyyətə mesajlarınız varmı?

Cavab:  Partiyaya və dövlət rəhərliyinə mesajım ondan ibarətdir ki, mən bundan sonra da Heydər Əliyev, İlham Əliyev siyasətinin əsgəri kimi öz xidməti borcumu yerinə yetirəcəyəm və o partiyadan kənarda mənim başqa bir mövqeyim ola bilməz.

Sual: Bəs, oğlunuza məsləhətiniz?

Cavab: Oğluma məsləhətim bu oldu ki, səhv yol tutub.

Sual: Bəs ictimaiyyətə?

Cavab: İctimaiyyətə də bildirdim ki, oğlum mənim ona etdiyim məsləhətlərə qulaq asmadı, başqa bir mövqe seçdi. -03-