Siyasi mühacir ovu gedir

Bakı/05.07.17/Turan: Jurnalist Əfqan Muxtarlının Gürcüstan ərazisində oğurlanmasından və gizlicə Azərbaycana təhvil verilməsindən sonra siyasi mühacirlərin azadlığının və hətta həyatının təhlükədə olduğu haqqında fikir dolaşmağa başlayıb.

Doğrudur, Muxtarlının həbsi faktiki olaraq Tbilisidən sığınacaq alan daha bir siyasi mühacir Daşqın Ağalarlını "xilas edib". Ona bir neçə il sonra əsaslı səbəb göstərmədən sığınacaq verməkdən imtina ediblər və vətənə qaytarmalı idilər. Bəzi məlumatlara görə, işə BMT belə müdaxilə etməyib. Amma Əfqan Muxtarlının qalmaqalından sonra onu Gürcüstanda saxlayıblar.

Amma, göründüyü kimi, Azərbaycan hakimiyyəti sakitləşməyib. Hüquq müdafiəçiləri Arif və Leyla Yunusun (onlar 2014-cü ildə həbs edilmişdi və şərti azadlığa buraxıldıqdan sonra xaricə gediblər, fəallıqlarını davam etdirirlər) məcburi şəkildə Ali Məhkəməyə gətirilməsi tələbi, habelə Azərbaycanın Avropa Şurasında keçmiş nümayəndəsi Arif Məmmədovun artıq yerli səviyyədə axtarışı haqqında xəbərlər bunu sübut edir. Məmmədovun iş materiallarında deyilir ki, o, CM-in 179.3.2-ci (böyük ölçüdə mənimsəmə və ya israf) maddəsində nəzərdə tutulmuş ittihamla axtarışdadır. Bir müddət əvvəl onun barəsində İnterpol xətti ilə axtrış elan olunub.

Adətən demokratik ölkələr insanı işgəncə və siyasi təqiblə üzləşə biləcəyi ölkəyə təhvil vermirlər. Amma ənənələri Gürcüstan ərazisində nümayişkaranə şəkildə oğurlanan, amansızca döyülən və AR CM-in 3 maddəsi ilə həbs edilən "Muxtarlının işi" pozdu. Ölkədə Muxtarlının oğurlanmasının fəallığına görə qisas, habelə digər fəal mühacirləri qorxutma aktı olduğuna çox az insan şübhə edir. Hakimiyyətin əli çatsa, mühacirət etmiş rejim əleyhdarlarını həbs etməyə hazır olduğu da şübhə doğurmur.

Və təkcə həbs etməyə deyil. Bu yaxınlarda Fransada yaşayan "Azərbaycan saatı" proqramının rəhbəri, jurnalist Qənimət Zahid bildirib ki, hakimiyyətin uzun əlləri onun boğazına da uzanır, daha konkret desək, o, ictimaiyyətə bildirib ki, onun qətli barədə sifariş daxil olub. Həm də, onun sözlərinə görə, qətl qüsursuz şəkildə həyata keçirilməlidir.

Avropa ölkələri xoşagəlməz siyasi mühacirləri təhvil verə bilərmi?

Hüquq müdafiəçisi Oqtay Gülalıyev hesab edir ki, hakimiyyət kidneping siyasəti həyata keçirir. "Eyni zamanda, onların siyasi mühacirlərin axtarışı və ölkəyə gətirilməsi üzrə fəaliyyəti güclənib", deyə o, Turan-a bildirib.

Hüquq müdafiəçisi qeyd edib ki, Azərbaycanözü də siyasi mühacirləri təhvil verir. Məsələn, bu yaxınlarda BMT xətti ilə sığınacaq almış şəxs Türkiyəyə təhvil verilib: "Xoşagəlməz mühacirlərin axtarışına gəlincə, bu, hakimiyyətin repressiyalarının tərkib hissəsidir. Getdikcə daha çox həm ölkədə, həm də beynəlxalq səviyyədə dayağını itirən Azərbaycan hakimiyyəti çıxış yolunu qorxutma və repressiyalarda görür. Buna görə onlar bu cür metodlara əl atırlar. Əfqan Muxtarlının başına gələn hadisə hakimiyyətə və onun nüfuzuna kifayət qədər ziyan vurub. Bundan sonra yaxın gələcəkdə daha bir belə addım atacaqlarını düşünmürəm. Amma aydındır ki, hakimiyyət həm ölkə daxilində, həm də onun hüdudlarından kənarda tənqidçiləri susdurmaq niyyətində qətiyyətlidirlər və imkan düşən kimi onlar yenidən müəyyən addımlar atacaqlar. Çox güman ki, bu, 2018-ci il prezident seçkilərini alternativsiz şəraitdə keçirməyə yönəlib.

O.Gülalıyev hesab edir ki, Avropa dövlətləri, çətin ki, məşhur siyasi mühacirləri təhvil versin. "Hakimiyyət bunu başa düşür, buna görə də Əfqan Muxtarlının oğurlanmasına əl atıb. Bunun təkrar oluna biləcəyi istisna deyil", deyə O.Gülalıyev qeyd edib.--0--