Siyavuş Novruzovun dedikləri onun hüquqi və siyasi mövqeyinə haqq qazandırmır

Bakı/24.08.20/Turan: Prezident Administrasiyasının sabiq rəhbəri, AMEA prezidenti Ramiz Mehdiyevin nəvəsinin toy mərasimi ətrafında baş verən gəlişmələr səngimək bilmir. Həmin toyda iştirak etmiş Siyavuş Novruzov bu gün Prezident İlham Əliyevə müraciət edərək onu Yeni Azərbaycan Partiyası İcra katibinin müavini vəzifəsindən azad etmək barədə xahiş edib.

Avqustun 18-də R.Mehdiyevin kürəkəni, eks-deputat İlham Əliyev Operativ Qərargahın və hökumətin qərarına zidd olaraq Novxanı qəsəbəsində bağ evində qızı Fidan Əliyevaya toy edib. Toydan yayılmış videogörüntülərdə  toyun iştirakçıları - deputat Siyavuş Novruzov, onun xanımı, Ombudsman Səbinə Əliyeva, Bakı Dövlət Universitetinin keçmiş rektoru Abel Məhərrəmov, Ramiz Mehdiyev və digərləri görünür.

Həmin görüntülərdən sonra deputat Siyavuş Novruzov mediaya açıqlamasında dəvət edilən toya getməyin vacib olduğunu bildirmişdi.

“İnsan insandır. Dost dostdur, düşmən düşməndir. Bu ağsaqqal adamdır, akademiyanın prezidentidir, məni dəvət edib toyuna. Mən indi necə getməyim ora? Onda mən şərəfsizlik paltarını geyinməliyəm və camaatın arasına şərəfsiz kimi çıxmalıyam. Mən kişiyəm.”

Elə həmin gün deputat Siyavuş Novruzova partiya xətti ilə töhmət elan olundu. Daha sonra isə Siyavuş Novruzov və xanımı Ombudsman Səbinə Əliyeva karantin qaydalarını pozduğuna görə hər biri 400 manat cərimə olundu.

Ötən gün isə Siyavuş Novruzov özünün facebook profilində status yazaraq Prezident Administrasiyasının sabiq rəhbəri, AMEA prezidenti Ramiz Mehdiyev tərəfindən aldadılaraq toya getdiyini bildirib.

“Bir gün sonra məlum olmuşdur ki, bizi ailəlikcə toya dəvət edərkən “Cənab Prezidentdən icazəsini almışam” deyən Ramiz Mehdiyev səhv məlumat vermişdir. Hətta məclis zamanı onun “Cənab Prezident bu gün səhər zəng edərək təbriklərini və xoş arzularını çatdırıb” deməyi də həqiqəti əks etdirmir. Yəni cənab Prezident İlham Əliyevin bu toy məclisindən xəbəri olmamışdır və bizi aldatmışlar".

Qeyd edək ki, toyun görüntüləri sosial şəbəkələrdə yayıldıqdan sonra, təşkilatçılar eks- deputat İlham Əliyev və onun qudası Rövşən Mustafayev əlləri qandallı şəkildə media qarşısında məhkəmə önünə çıxarıldı və hər birinə 15 sutka inzibati həbs verildi. Toyda iştirak etmiş BDU-nun keçmiş rektoru Abel Məhərrəmov, Azərbaycan Dövlət Filarmoniyasının direktoru Murad Adıgözəlzadə və həyat yoldaşı Aysel Teymurzadə, keçmiş rabitə naziri Əli Abbasov, həmçinin qeyd etdiyimiz kimi deputat Siyavuş Novruzov və xanımı Ombudsman Səbinə Əliyeva İnzibati Xətalar Məcəlləsinin  211.1-ci (Epidemiya əleyhinə, sanitar-gigiyena və karantin rejimlərinin pozulması) maddəsi ilə cəzalandırılaraq hər biri 400 manat cərimə olunub. Bu şəxslərdən başqa toyda iştirak edən daha 17 nəfər də cərimələnib.

Siyavuş Novruzov açıqlaması ilə Prezidenti zərbə altına qoymaq istəyib.

Hüquqşünas Ələsgər Məmmədli Turan-a deyib ki, deputat hər hansı bir addım atarkən özünə və təmsil etdiyi quruma hörmət etməlidir.

“Azərbaycanda karantin barədə hüquqi rejimi Milli Məclis qəbul edib. Parlamentin qəbul etdiyi Əhalinin Sağlamlığı və Epidemioloji Vəziyyət haqqında qanuna uyğun olaraq Nazirlər Kabineti karantin elan edib. Parlamentin qəbul etdiyi qanun çərçivəsində karantini icra edən Nazirlər Kabinetinin qərarında istisna hal yoxdur ki, onu Prezident və ya Baş nazir poza bilər. Konstitusiyanın 25-ci maddəsinə görə qanun hər kəs üçün bərabər tətbiq olunmalıdır. Yalnız qanunun normativ aktlar çərçivəsində Konstitusiyaya uyğunluğu mübahisələndirilə bilər.”

Ələsgər Məmmədlinin fikrincə,  Siyavuş Novruzovun açıqlaması onu deməyə əsas verir ki, deputat olaraq o bu qanunun qəbul olunmasına səs verib və indiki halda bu qanunu özü bilərəkdən qəsdən pozub.

“Və qanunu pozarkən istinad yeri kimi Prezidenti göstərib. Bu siyasi baxımdan Prezidenti hədəf göstərməkdir ki, yəni Prezident icazə verirsə qanunlar pozula bilər. Siyavuş Novruzov bu açıqlaması ilə Prezidenti zərbə altına qoymaq istəyib. O, bu açıqlaması ilə Prezidenti qanunları pozan tərəf kimi göstərməyə çalışıb. “Ramiz Mehdiyev bizi aldadıb”- deməklə Siyavuş Novruzov bunu fərqli formada deyir. Bir sözlə Siyavuş Novruzovun qanunları “Prezident icazə verdi deyə pozduq və əslində belə deyilmiş” - deməsi onun hüquqi və siyasi mövqeyinə haqq qazandırmır.

Kiməsə müstəsna halda toy keçirmək icazəsi vermək çox anlamsızdır.

Milli Məclisin Hüquq siyasəti və dövlət quruculuğu komitəsinin üzvü Erkin Qədirli Turana açıqlamasında bildirib ki, Prezident istənilən vaxt Nazirlər Kabinetinin qərarını ləğv edə bilər. Amma Prezidentin qanunu gözardı edərək, kiməsə xüsusi imtiyaz verməsi məntiqli deyil.

“Prezident istədiyi vaxt Nazirlər Kabinetinin qərarını ləğv edə bilər. Amma bu tamam başqa kontekstdir. Prezident özü taprşırıq verib ki, bu işlərlə Nazirlər Kabineti məşğul olsun və onun yanında Operativ Qərargah yaradıb. Açıqlamalarından və çıxışlarından görünür ki, Prezident o quruma güvənir. Ona görə də hamıya toy etmək qadağan olunduğu halda kiməsə xüsusi imtiyaz vermək, kiməsə müstəsna halda toy keçirmək icazəsi vermək çox anlamsızdır. Prezident bunu etməz. Qanun hamı üçün birdir. Prezident karantin rejiminin ləğvini istəsə, özü tapşırar Nazirlər Kabinetinə ya da özü elə Nazirlər Kabinetinin qərarını ləğv edər. Prezidentin hüquqi baxımdan buna səlahiyyəti var.”

Erkin Qədirli deyir ki, Siyavuş Novruzov Prezidentin adını Ramiz Mehdiyevi vurmaq üçün hallandırır.

“Anlaşılan odur ki, Siyavuş Novruzovun sözlərinə görə, Ramiz Mehdiyev Prezidentin adından sui istifadə etməklə onları aldadıb. Bu açıqlama istənilən halda Prezidentə yox, Ramiz Mehdiyevə qarşı yönəlik fikirdir.”