Söyüdlü yatağında işlər istehsalın modernləşdirilməsindən sonra mərhələli şəkildə bərpa edilə bilər

Bakı/26.09.23/Turan: Araşdırmalar Gədəbəydəki qızıl mədənindən emal tullantılarının axıdılması üçün yaradılan su anbarlarında zərərli maddələrin miqdarının normadan artıq olduğunu aşkar edib. Bu barədə Gədəbəy rayonunun Söyüdlü kəndində vəziyyətin araşdırılması üçün baş nazir Əli Əsədovun yanında yaradılmış komissiyanın sentyabrın 26-da keçirilən iclasında bildirilib.

Lakin müəyyən edilib ki, “bu, ətraf mühit və insan sağlamlığı üçün təhlükə mənbəyi deyil”, - Nazirlər Kabinetinin mətbuat xidmətinin məlumatında deyilir.

İstehsal və yaşayış sahələrində yeraltı suların monitorinqi zamanı zavod ərazisindəki üç müşahidə quyusunun suyunda kiçik miqdarlarda sianidin olduğu qeydə alınıb.

Qeyd olunan göstəricilər yol verilə bilən qatılıq həddindən dəfələrlə aşağı olsa da, bu fakt ətraf mühitə potensial risk kimi nəzərə alına bilər.

İclas zamanı qərara alınıb ki, zavodun fəaliyyətinin mərhələli şəkildə bərpası yenidənqurma və modernləşdirmə işlərinin yerinə yetirilməsi qrafikinin işlənib hazırlanmasından və təqdim olunmasından, onun müvafiq dövlət qurumları ilə razılaşdırılmasından sonra təmin oluna bilər.

İyunun 20-də Söyüdlü sakinləri yaxınlıqda yerləşən qızıl mədən müəssisəsi tərəfindən ətraf mühitin çirkləndiyini bəyan edərək etiraz aksiyası keçiriblər. Polis etiraz aksiyasını sərt şəkildə dağıdıb, ən fəal iştirakçıları saxlayıb. Daha sonra hakimiyyət mədəni istismar edən "Anglo Asian Mining" şirkətinin fəaliyyətində problemin olduğunu etiraf edib və araşdırma üçün hökumət komissiyası yaradılıb.03B06