S.Rüsətmxanlı: Millətimizin haqlarını qorumaq vəzifəmizdir

İranın Azərbaycan səfirliyi Dünya Azərbaycanlıları Konqresinin (DAK) bu günlərdə keçirdiyi tədbirlə bağlı etiraz bəyanatı yayıb.

Səfirlik DAK-ın Güney Azərbaycan türklərinin durumu ilə bağlı keçirdiyi tədbiri “separatçılıq” adlandırıb. Bundan əlavə, səfirlik DAK-ı xalqa söykənməyən, siyasi yeri olmayan, dövlət himayəsindən məhrum “kiçik dəstə” hesab edir. Səfirliyə görə, qurum Güney Azərbaycanla bağlı tədbirləri gündəmdə qalmaq üçün keçirir. Müəlliflər DAK-ı “İran və Azərbaycan xalqları”nın düşmənlərinə xidmət etməkdə, sionizm mediası ilə birgə indiki əlaqələri zəiflətməkdə ittiham edib.

Bəyanatda hər iki ölkənin xalq və rəhbərliyinin ayıqlığı və diqqətli olması nəticəsində belə “təxribat”ların baş tutmadığı nəzərə çatdırılır. Səfirlik DAK-ın tədbirini “separatçı dəstənin” İrana hörmətsizliyi sayaraq, buna “dözməyəcəyi”, “İrana olan təhqirə hüquqi qiymət veriləcəyi” hədə-qorxusu gəlir.

Daha sonra müəlliflər İranda Azərbaycan əleyhinə belə toplantılara yol verilmədiyini nəzərə çatdırır. Rəsmi Bakıdan İranın ərazi bütövlüyünü sual altına alan bu kiçik separatçı dəstə ilə qanun çərçivəsində davranmaq kimi diplomatik və siyasi etikadan uzaq tələb irəli sürür.

Sentyabrın 8-də DAK Bakıda “Yaxın Şərqdə baş verən proseslər: Güney Azərbaycandakı son durum” mövzusunda Güney Azərbaycanla bağlı dinləmələr keçirib. Güney Azərbaycan türklərinin problemləri barədə danışılıb. Yaxın Şərqdə baş verən dəhşətli hadisələr fonunda Azərbaycan dövlətinin Güney Azərbaycana sahib çıxmalı olması təklifi səsləndirilib.

Adı çəkilən bəyanatla bağlı Turan-a şərh verən DAK həmsədri, deputat Sabir Rüstəmxanlı İran səfirliyinin belə bir bəyanatla çıxış etmək haqqı olmadığını deyib. Bu sənədi insan haqlarını pozmaq kimi dəyərləndirib. DAK-ın ictimai qurum olduğunu deyən S.Rüsətmxanlı Güney Azərbaycan türklərinin insani haqları barədə danışmağı qurumun birbaşa vəzifəsi adlandırıb. Eyni zamanda, İran tərəfin, bəzi beynəlxalq qurumların İranda Güney Azərbaycan türklərinin sayının reallıqda olduğundan az göstərilməsi kimi “proses”ə diqqət çəkib.

Daxili işlərə qarışmağa gəlincə, S.Rüstəmxanlı İranın “Səhər” telekanalının Azərbaycan dövlət müstəqilliyini, dövlət atributlarını daim təhqirə məruz qoymaqda ittiham edib. Hətta Azərbaycanı dövlət olaraq öz adı ilə deyil, başqa adlarla adlandırmağa cəsarət edir. İran Azərbaycanla “qardaş dövlət” olduğunu deyir. Bu, necə qardaşqlıqdır ki, millətin dilini əlindən alırlar. Özünü dini dövlət sayan İran tərəf bilir ki, dili verən Allahdır. Allahın verdiyini isə insanın əlindən almaq Allaha qarşı üsyandır. Özünü Azərbaycana dost sayan İran Ermənistanla əməkdaşlıq edir. Urmi gölü qurudulur, İŞİD Güney Azərbaycan torpaqlarını tutacağı hədə qorxusu gəlir, İran tərəf isə buna hər-hansı mövqe ifadə etmir.

“Odur ki, İran tərəfin belə bəyanatla çıxış etməyə, səfirin əsəb nümayiş etdirməsinə əsası yoxdur. Belə əsəbləri də çox görmüşük, belə səfirləri də, hər kəs öz işilə məşğul olsun və başqasının nə edəcəyi ilə bağlı hökm verməsin”, - deyə S.Rüstəmxanlı İran səfirinə mesaj ünvanlayıb. -05D/B-