STP: İndi zorun qalib gəldiyi ən çətin dövrdür

Bakı/20.09.16/Turan: Sivil Toplum Platforması (STP) ölkədə mövcud olan son siyasi basqılarla bağlı mövqe sənədi yayıb.

Müəlliflər bir neçə aydır ki, ölkədə bütün ictimai münasibətlər sistemini zədələməkdə olan yeni basqı dalğasından narahatlıqlarıını bildirirlər. Sənəddə deyilir ki, belə basqılar əsas insan hüquq və azadlıqlarını, hakimiyyəti  tənqid edən insanları hədəf alır: “Belə basqıların nəticəsi olan idarəetmənin siyasi məhbus problemi sosial-iqtisadi böhranla birlikdə daxili ictimai-siyasi durumu və beynəlxalq münasibətləri ciddi şəkildə gərginləşdirir”.

Müəlliflər basqıların mütəşəkkil xarakter daşımağa başlamasına təəssüf edir, beynəlxalq qurumların siyasi məhbuslara azadlıq istəməsinə baxmayaraq, həbs və təzyiqlərin artdığını bildirirlər. Sənəddə məhkəmələrin müstəqil olmaması xüsusi vurğulanır: “Qanuna, hüquqa məhəl qoymayan məhkəmələr siyasi sifarişlərin icraçısı funksiyasını yerinə yetirməkdədir. Məhkəmə müstəqilliyi ciddi təhlükə altındadır, hakimlər qanuna və hüquqa məhəl qoymadan siyasi sifarişlə insan azadlığını məhdudulaşdırırlar”. Sənəddə deyilir ki, xeyli sayda müxalif və müstəqil düşüncəli şəxslərin saxta ittiham və məhkəmə hökmlərilə həbs olunması təkcə yerli ictimiayyətə yox, dünya birliyinə də məlumdur.

Müəlliflər Konstitusiyaya zidd olduğu üçün Referenduma etiraz edən siyasi qüvvələrə (Musavat Partiyası və REAL) qarşı total təzyiqlər başladığını, referendumda rəsmi iştiraka və təşviqata imkan verilmədiyini vurğulayırlar: 

“REAL və NİDA üzvlərinin həbsi və cinayət təqibi, qondarma “Gülənçi işi” üzrə AXCP üzvlərinə qarşı həbslər və cinayət işlərinin aparılması, vaxtaşırı “Azadlıq” qəzetinin çapına süni əngəllərin yaradılması birbaşa ifadə azadlığına qarşı yönəlmiş sistemli siyasətdir”.

Sənəddə hazırki dövr ölkədə hüququn, barışın, həmrəyliyin ən ağır imtahanlar verdiyi, zorun qalib olduğu ən çətin dövr kimi dəyərləndirilir: “Öz təməl hüquq və azadlıqlarının təmin olunmasını demokratik vasitələrlə istəyən vətəndaşları zorakılığa məruz qoymaq, həbs etmək, heç bir hakimiyyətə nüfuz qazandırmır”. Müəlliflrə görə, əksinə, belə dözülməz mühit Azərbaycanı mütərəqqi dünyanın gözündən salır, ölkənin firavan gələcəyi üçün ciddi təhlükələr doğurur. Müəlliflər hökumətin mövcud mühitdən narahat görünmədiyini, durumun yumşaldılması üçün addımları atmadığını deyirlər.  

Son olaraq müəlliflər hakimiyyətə demokratik inkişafın əsas elementlərindən olan media və ifadə azadlığını təmin etmək, vətəndaşların təməl hüquq və azadlıqlarına hörmət göstərmək çağırışı edirlər. -0-