Su sayğaclarının olmaması əhalinin hüquqlarını pozur

Bakı/20.12.18/Turan: Turan-ın redaksiyasına Bakının Sabunçu rayonu, Anaşkin küçəsi, bina 7, mənzil 6 ünvanında yaşayan sakin Elşən Həsənovdan şikayət daxil olub. O, özünü Sabunçu rayonu Su Kanalı Idarəsinin işçiləri tərəfindən aldadılmış hesab edir. Telefon söhbətində Həsənov izah edib ki, İdarənin nəzarətçisi Eldəniz 2016-cı ildə ona su ödənişini sayğacsız, ailə üzvlərinin sayına görə müəyyən edilmiş dövlət normasına uyğun sənədləşdirməyi təklif edib. Ödəniş edəcəyi kodu verməyi vəd edib.

Ailə başçısı razılaşıb və nəzarətçiyə mənzildə həyat yoldaşı ilə, iki nəfər yaşadıqları barədə MİS-dən arayış təqdim edib. Xidmətə və sudan istifadəyə görə nəzarətçi Həsənovdan 85 manat alıb.

Elşən Həsənov Siyasi Məhbusların Monitorinqi Mərkəzinin rəhbəri və Siyasi Məhbuslara Azadlıq Uğrunda İttifaqın koordinatorudur. Keçmiş vicdan məhbusudur, 2 aprel 2011-ci il mitinqində iştiraka görə həbs edilmişdi.

İki il ailə sudan istifadə edib, nəzarətçi gəlməyib, ödəniş kodunu da verməyib. Üç ay əvvəl Həsənovlar ailəsi istifadə olunmuş suya görə 180 manat borcu olduğu haqqında bildiriş alıb.

İldə adambaşına beş kubmetr suyu 0,35 manatdan hesablayaraq (Tarif Şurasının su sayğacı olmayan evlər üçün norması belədir) Həsənov ailəsinin Su Kanalı İdarəsində dörd nəfərlik ailə kimi qeydiyyata alındığını başa düşüb.

Sabunçu rayon idarəsinin rəis müavini Elman Əliyevin qəbulunda Həsənov izah edib ki, iki il əvvəl Eldənizə MİS-dən ailə üzvlərinin iki nəfər olması barədə arayış təqdim edib və borcu yenidən hesablayaraq, iki nəfərlik rəqəmə endirməyi xahiş edib. Amma məmur vətəndaşa kobudluq edib, nəzarətçidən arayış almadığını deyib və "hara lazımdırsa" şikayət etməyi təklif edib.

Evə qayıdan Elşən Həsənov Eldənizə zəng edərək, telefon söhbətini diktofona yazıb. Eldəniz ondan arayış aldığını təsdiq edib və inandırıb ki, iki il əvvəl arayışı İdaryə təqdim edib. Məsələni aydınlaşdırmağa və məlumat verməyə söz verib, amma sözünü tutmayıb. Telefon söhbətinin audioyazısı redaksiyada mövcuddur.

E.Həsənov Baş Prokurorluğa şikayət göndərib, Sabunçu Su Kanalı İdarəsinin fırıldaqçılığını araşdırmağı xahiş edir.

Dekabrın 19-da və 20-də jurnalistlər dörd dəfə Su Kanalı İdarəsinin Sabunçu rayon şöbəsinə zəng ediblər (tel. 4254844), amma Elman Əliyev telefona cavab verməyib, operator isə onun "iş adamı olduğunu, obyektlərə çıxdığını" deyib.

Vətəndaş Elşən Həsənovun aldadılması hadisəsi qeydiyyatda olan sakinlərin sayına görə ödənişdən imtina edərək, sayğaca keçməyin vacibliyini göstərir. Ölkənin bütün rayonlarında vətəndaşların bu şəkildə aldadılması yayılıb. "Azərsu" nədənsə vətəndaşların təqdim etdikləri arayışlara məhəl qoymadan, avtomatik olaraq Azərbaycanda ailə üzvlərinin sayının 4 nəfərdən ibarət olması hesabı ilə borc çıxarır. Bu problem əvvəllər də KİV-də qaldırılıb, amma hələ də həllini tapmayıb. -0-