Tale Bağırzadə aclıq edir

Bakı/06.06.22/Turan: Uzunmüddətli həbs cəzası çəkən "Müsəlman Birliyi" Hərəkatının rəhbəri Tale Bağırzadə iyunun 3-də aclığa başlayıb. O, polis bölməsində inanclı insanların işgəncəyə məruz qalmasına və hüquq-mühafizə orqanlarının Allahı təhqir etməsinə etiraz edir.

Bağırzadənin həyat yoldaşı Leyla İsmayılzadənin Turan-a verdiyi məlumata görə, mayın 20-də Bakı Ağır Cinayətlər Məhkəməsinin qarşısında saxlanılan beş nəfər dindarı özlərini Dövlət Təhlükəsizliyi Xidmətinin əməkdaşl kimi təqdim edən şəxlər işgəncəyə məruz qoyub.  

"İşgəncə verən şəxslər Allahı da söyüb. Tale buna etiraz edir və həmin şəxslərin cəzalansdırılmasını tələb edir. İşgəncə məsələsi ilk deyil, amma Allahın söyülməsi pik nöqtədir", deyə İsmayılzadə bildirib.  

Onun sözlərinə görə, Bağırzadə iyunun 3-də aclıq aksiyasına başlaması ilə bağlı Qobustan Qapalı Həbsxanasının rəhbərliyini rəsmi qaydada məlumatlandırıb. Leyla İsmayılzadə iyunun 5-də həyat yoldaşı ilə telefonla danışıb. "O, səhhətində hələ problem olmadığını və aclığı sonuna qədər davam etdirəcəyini bildirib", deyə İsmayılzadə qeyd edib.

Öz növbəsində, Dövlət Təhlükəsizliyi Xidmətinin mətbuat xidmətindən Turan Agentliyinə bildiriblər ki, DTX əməkdaşlarının küfrü haqqında məlumat həqiqətə uyğun deyil. 

Xatırladaq ki, mayın 20-də Bakı Ağır Cinayətlər Məhkəməsində "Müsəlman Birliyi" Hərəkatının üzvü Razi Abbasov barəsində hökm oxunub. O, 6 il müddətinə azadlıqdan məhrum edilib. Bu zaman polis prosesi izləmək üçün gələn, məhkəmənin qarşısında toplaşanları dindarları dağıdıb. Beş nəfər saxlanılıb, "Müsəlman Birliyi"nin üç üzvü - İmran Məmmədli, Elgiz Məmmədov və Ağəli Yəhyayev polisə müqavimət ittihamı ilə təqsirləndirilərək bir aylıq inzibati həbsə məhkum edilib, digər iki fəal saxlanıldıqdan bir neçə saat sonra sərbəst buraxılıb.

Onlardan biri, Mail Kərimov deyib ki, onu məhkəmənin qarşısında saxlayıb, əvvəlcə 22-ci polis bölməsinə, sonra isə Baş Mütəşəkkil Cinayətkarlıqla Mübarizə İdarəsinə aparıblar. Kərimov həm yolda, həm də idarədə işgəncələrə məruz qaldığını bildirib. Hərəkatın digər fəalı Süleyman Ələkbərov da buna bənzər bəyanat verib.

Onlar mayın 23-də keçirdikləri mətbuat konfransında bildiriblər ki, işgəncələr təhqirlərlə, o cümlədən Allahın ünvanına söyüşlərlə müşaiyət olunub. DİN bu bəyanatları əsassız və yalan bəyanat adlandırıb. -06B-