Taleh Bağırzadənin işi üzrə məhkəmə noyabrın 1-nə keçirilib

Bu gün Sabunçu Rayon Məhkəməsində ilahiyyatçı Taleh Bağırzadənin işi üzrə təyin edilmiş iclas təxirə salınıb. Buna T.Bağırzadənin vəkillərinin başqa proseslərdə məşğul olması səbəb olub.

Vəkil Cavad Cavadov Turan-a bildirib ki, T.Bağırzadənin qohumları jurnalistlərin məhkəmə zalına buraxılmamasından şikayətləniblər. Odur ki, T.Bağırzadə bildirib ki, məhkəmə prosesi media üçün açıq olmayınca onun vəkilləri iclas zalına gəlməyəcəklər.

Hakim iclası noyabrın 1-nə keçirib.

Azadxəbər.net saytının məlumatına görə, proses zamanı mülki geyimli şəxslər üç dindarı  saxlayaraq harasa aparıblar. Lakin tezliklə onları buraxıblar. Məhkəmə binası DİN çevik alayının əməkdaşlarının və mülki geyimlilərin mühafizəsinə götürülüb.

Xatırladaq ki, oktyabrın 28-də polis T.Bağırzadəni dəstəkləməyə gələn 40-dək dindarı saxlayıb. Onlardan üçü polisə müqavimətdə ittiham olunaraq həbs edilib.

*Martın 31-də T.Bağırzadə öz sürücüsü Anar Məlikovla birlikdə qanunsuz maddə saxlamaq ittihamı ilə həbs olunub. Sonradan A.Məlikov qanunsuz silah saxlamaqda ittiham olunaraq 1 il 7 ay müddətinə azadlıqdan məhrum edilib. Lakin həbsin əsl səbəbi T.Bağırzadənin hakimiyyəti və İlham Əliyevi kəskin tənqid etməsidir. -16D-