![Açiq mənbələrdən foto.](https://turan.az/resized/media/2021/main/052000033052-750-500-resize.webp)
Açiq mənbələrdən foto.
Bakı/20.05.21/Turan: Azərbaycan Talışların İctimai Şurası 12 -13 may 2021-ci il tarixlərində Şuşa şəhərində keçirilən “Xarıbülbül” müsiqi festivalı ilə bağlı bəyanat yayıb. Şura bəyanatda festivalda talış folklorunun təhrif olunmuş şəkildə təqdim edilməsi ilə bağlı iradlarını dilə gətirir.
“44 günlük Vətən müharibəsində rəşadətli Azərbaycan Ordusunun erməni qəsbkarları üzərində qazandığı şanlı qələbə nəticəsində ölkəmizin ərazi bütövlüyü təmin edildi. 30 ilə yaxın dövr ərzində işğal altında olan ərazilərimiz, o cümlədən, “Azərbaycanın Müsiqi Konservatoriyası” sayılan Şuşa şəhəri düşməndən azad edildi. Bilirik ki, hələ Sovet dönəmində Şuşa şəhərində hər il “Xarıbülbül” müsiqi festivalı keçirilirdi. Şuşa şəhəri işğaldan azad edildikdən sonra, Heydər Əliyev Fondu bu şanlı ənənəni davam etdirərək, 12 - 13 may 2021-ci il tarixlərdə yenidən bu qədim Azərbaycan şəhərində “Xarıbülbül” musiqi festivalını həyata keçirtdi. Sevindirici haldır ki, festivalın işində vətənimizin ayrı-ayrı etnoslarının xalq kollektivləri ilə yanaşı, təmsil olunduğumuz talış xalqının (Masallı rayonu Mahmudavar kənd “Halay” və Lənkəran rayonu Separadi kənd “Nənələr”) xalq folklor kollektivləri da iştirak etdilər. Keçirilən festivalın mötəbərliyi bir də ondan ibarət idi ki, onun gedişində Azərbaycan Respublikasının Prezidenti İlham Əliyev cənabları və 1-ci Vitse Prezident Mehriban xanım Əliyeva şəxsən iştirak etdilər. Azərbaycan Talışların İctimai Şurası (ATİŞ) da öz növbəsində Şuşa şəhərində keçirilən “Xarıbülbül” müsiqi festivalının işini diqqətdə saxlayaraq müşahidə etmiş və gəldiyi qənaətlə bağlı aşağıdakıları bəyan edir.
Azərbaycan Talışların İctimai Şurası Şuşa şəhərində keçirilən “Xarıbülbül” müsiqi festivalının keçirilməsini səmimyyətlə, böyük hərarətlə alqışlayır və bu tədbiri Azərbaycan dövlətinin ölkəmizin istedadlı incəsənət xadimlərinə və xalq yaradıcı kollektivlərinə göstərdiyi qayğı və diqqətin ifadəsi kimi qiymətləndirir. Azərbaycan Talışların İctimai Şurası incəsənət adamları ilə yanaşı, ölkəmizin digər qardaş xalqlarının mahnı, müsiqi və folklor kollektivlərinin çıxışlarını, eləcə də Vətənimizdə dilindən və dinindən asılı olmayaraq, bərabərhüquqlu vətəndaş cəmiyyəti harmoniyasını təmin edə biləcək “Xarıbülbül” müsiqi festivalının hər ilin may ayında Şuşa şəhərində keçirilməsi ideyasını dəstəkləyir. Lakin yuxarıda sadaladığımız bütün uğurlarla yanaşı olaraq Azərbaycan Talışların İctimai Şurası 12-13 may 2021-ci il tarixlərdə Şuşa şəhərində keçirilən “Xarıbülbül” müsiqi festivalında yol verilən bəzi nöqsan və iradları tədbir iştirakçılarının və icraçılarının nəzər-diqqətinə çatdırmağı məqsədəmüvafiq hesab edir ki, həmin tədbirdə iştirak edən Lənkəran rayonu Separadi kəndinin “Nənələr” və Masallı rayonu Mahmudavar kəndinin ”Halay” talış xalq folklor kollektivlərinin adlarını ümumiləşdirərək, heç kimin tanımadığı, “Veteranlar” folklor kollektivi kimi, eləcə də həmin kollektivlərin müəllif mətni əsasında birgə kompozisiya şəklində ifa etdikləri mahnını təhrif edərək, “Talış xalq folklor motivləri” adı altında təqdim etməyi sadəcə olaraq saxtakarlıq, saf niyyətdən uzaq, son nəticədə isə assimlasiyaya xidmət edə biləcək bir planın tərkib hissəsi hesab edir və bu sayaq yanaşmaların yolverilməz olduğunu bir daha bəyan edir!
Talış xalqı yaşadığı regionun aborigen sakini kimi uzun yüzilliklər ərzində tarixən təkcə öz folklor nümunələrini deyil, həm də xalq musiqisini də inkişaf etdirmişdir. Bu gün öz ana dilində xalq mahnılarını ifa edən neçə-neçə talış müğənniləri təkcə Azərbaycanda deyil, ölkəmizdən çox-çox uzaqlarda tanınır, dinlənir və alqışlanır. Lakin təccüblü burasındadır ki, talış xalq musiqi nümunələri heç bir dövlət tədbirlərində təbliğ və təqdim edilmir. Halbuki, “Xarıbülbül” festivalında digər xalqların xalq müsiqisindən nümunələr festival iştirakçılarının diqqətinə çatdırıldı.
Azərbaycan Talışların İctimai Şurası yuxarıda qeyd edilən neqativ hərəkətləri talış xalqına qarşı yönələn assimilyasiya, diskriminasiya halları, o cümlədən son illərdə uydurulan cürbəcür məkrli planların tərkib hissəsi hesab edir və hakimiyyət orqanlarından bu cür saxtakarlıqlara son qoyulmasını tələb edir”, deyə bəyanatda qeyd edilir. -0-
Rəy yaz