Azərbaycanda maskadan istifadənin ləğvi, toy və digər mərasimlərin təşkili ilə bağlı qaydalar hazırlanır

Bakı/20.05.21/Turan: Nazirlər Kabineti yanında Operativ Qəraragah tərəfindən ölkədə epidemioloji vəziyyət dəyərləndirilərək yumşaldılma tədbirləri barədə müzakirələr aparılır.

TƏBİB-in Xəstəliklərin profilaktikası və kontrolu departamentinin müdiri Yaqut Qarayevanın sözlərinə görə, açıq havada fiziki məsafə qorunmaq şərtilə, maskadan istifadənin ləğvi, habelə toy və digər mərasimlərin təşkili ilə bağlı qaydalar hazırlanır. Yaxın vaxtlarda həmin qaydaların açıqlanması nəzərdə tutulur. “Açıq havada və insanların fiziki məsafəni saxlaması şərtilə maskaların ləğv olunması elan oluna bilər. Amma rəsmi açıqlamaları gözləmək lazımdır. Mən həkim olaraq düşüncələrimi bölüşürəm. Ümumiyyətlə, vətəndaşları narahat edən bir çox məsələlər var. İstər şadlıqlarımız olsun, insanların kütləvi toplaşmasına səbəb olan mərasimlərimiz - hamısı müzakirə olunur. Bəlli qaydalar hazırlanır. Bir ildir deyirik ki, normal həyat anlayışı dəyişəcək”.

Eyni zamanda, Qarayeva çimərlik və vaksinlərlə bağlı da açıqlama verib.

"Vaksinasiya olunan insanların sayı artdıqca normal həyata qayıda bilərik. Çimərliklə bağlı isə onu deyə bilərəm ki, qaydaları biz tənzimləmirik. Bu istiqamətdə müzakirələr gedir. Biz sadəcə həkim olaraq tibbi cəhətdən qiymət verə bilərik", deyə o qeyd edib.

Azərbaycanda koronavirus infeksiyasına ilk yoluxma 2020-ci il fevralın 28-də aşkarlanıb.

Ölkə ərazisində elan edilmiş xüsusi karantin rejimi iyunun 1-dək davam edəcək. Həftəsonu və bayram günlərində ölkənin bütün ərazisində ictimai nəqliyyatın hərəkəti dayandırılıb.

Nazirlər Kabinetinin qərarına görə, xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda tibbi maskalardan istifadə məcburidir. -0-