Tayfurə Əliyeva: "Bu, kişilik deyil, bu insanlıq deyil"

Bakı Apellyasiya Məhkəməsində Ağır Cinayətlər Məhkəməsi tərəfindən jurnalist Rasim Əliyevin rezonans doğuran qətlində təqsirli bilinmiş Elşən İsmayılov, Samir Mustafayev, Kənan Mədətov, Camal Məmmədov və Arif Əliyevin şikayətinə baxılması üzrə növbəti iclas keçirilib. Zalda auditoriyanın böyük hissəsini müttəhimlərin dostları və doğmaları təşkil edirdi.

Qədim Babayevin sədrliyi ilə məhkəmə təqsirləndirilən şəxslərin vəkillərinin zərərçəkmiş tərəfə 1 saylı Klinik Mərkəzin həkimlərinin məhkəmə istintaqına cəlb edilməsi, məhkəməyə əlavə şahidlərin çağırılması, Rasim Əliyevin daxili orqanlarının rentgen görüntülərinin məhkəməyə təqdim edilməsi haqqında vəsatətlər təqdim etməsi ilə başlayıb. Zərərçəkmiş tərəfin vəkili Fariz Namazlı bildirib ki, vəsatətlərlə razıdır, o, xüsusən şahidlərin dindirilməsi və rentgen görüntüləri üzərində dayanıb: "Hesab edirəm ki, vəsatətlər təmin edilməlidir". Daha sonra məhkəmə dörd təqsirləndirilən şəxsin vəkili Şəmsəddin Quliyevə söz verib: "Rentgen görüntüləri məhkəməyə təqdim edilsə, həkimlər mütləq məsuliyyətə cəlb olunacaqlar. Cinayət işinin mahiyyəti məhz bu görüntülərdədir. Ekspertlər öz rəylərində rentgen görüntüləri haqqında heç nə yazmayıblar, ona görə ki, onlarda Əliyevin qabırğalarının qırılmadığı görünür". Bu sözlərdən sonra prokuror Səhiyyə Nazirliyinin məktubuna və ekspertiza rəyinə əsaslanaraq, məhkəmədən vəsatətləri təmin etməməyi xahiş edib. Vəkil Quliyev yenidən söz istəyib: "Mən ekspertlərin rəylərindən deyil, rentgen görüntülərindən bəhs edirəm. Rasim Əliyev əməliyyat olunmayıb. Kimsə ölümdən sonra içəri girib və onun qabırğalarını sındırıb, öd kisəsini partladıb. Niyə rentgen görüntüsü yoxdur? Qoy bizə reanimasiyadan videokamera görüntülərini təqdim etsinlər".

Məhkəmə yerindəcə məsləhətləşərək, vəsatətləri təmin etməyib. Bu, müttəhimlərin kəskin narazılığına səbəb olub. Samir Mustafayev yerindən qışqırıb: "Heç bir vəsatətimizi təmin etmirlər, həmişə belədir...". Camal Məmmədov onu dəstəkləyib: "Niyə həkimlərin yerinə hər yoldan keçəni şahid qismində məhkəməyə gətirirlər? Videokamera görüntüləri var. O gün nə baş verdiyini görməmək üçün kor olmaq lazımdır!".

Hakim müttəhimlərin sözünü kəsib və zərərçəkmiş tərəfin vəkilinə söz verib. Namazlı bildirib ki, hökm qanunsuzdur və hakimlərdən işi birinci instansiya məhkəməsinə qaytarmağı xahiş edib.

Daha sonra Rasim Əliyevin anasına söz verilib: "Müttəhimlərin sözlərinə görə, Rasimin ölümündə təkcə həkimlər təqsirlidir. Onlar deyirlər ki, belə zərbələrdən adam ölmür. Mən Rasimi USM edən həkimlə söhbət etmişəm. O gileylənirdi ki, həkim Babək Zeynalovun oğluma yardım göstərməməsini başa düşə bilmir. Axı onun pnevmotoraksı var idi. Rasimin başı zədələnmişdi, Elşən İsmayılovun vurduğu zərbədən sonra qulağı eşitmirdi. Bundan sonra Elşən zədə olmadığını deyə bilir? Bu insan birinci dəfə belə əməl törətmir. Əvvəllər o, bıçaqla adam yaralayıb və bu əməli cəzasız qalıb. Onlar bandit qrupudur, Cavid Hüseynov (aralarında olan mübahisə Rasimin döyülməsinə və vəfat etməsinə səbəb olan futbolçu - red.) da bu qrupa daxildir. Onlar Rasimi müşahidə kameraları önündə döyüblər. Hamı bilir ki, indi ən kiçik mağazada belə kamera var. Onlar buna necə cürət ediblər? Onların əməlləri Rasimin Cavid Hüseynovun və müttəhimlərin tərbiyəsiz olduğu haqqında sözlərini təsdiq edir. Mən Cavidin və Elşənin dəfələrlə Rasimə zəng etməsinin şahidi olmuşam. O, yalnız Cavidlə danışdıqdan sonra Elşənlə görüşməyə razılaşıb. Oğlumu aldadaraq evdən çıxarıblar və döyüblər. Bəli, həkimlərin də təqsiri var. Biz gələnə qədər iki saat Rasimi dəhlizdə saxlayıblar, yardım etməyiblər. O, Babəklə mübahisə edirdi, deyirdi ki: "Niyə məni xəstəxanaya yatırmırsınız?". Müttəhimlərə gəlincə, onlar cəmiyyət üçün ən təhlükəli insanlardır. Qozbeli qəbir düzəldər. Onlar çıxan kimi yenə eyni şeyi təkrar edəcəklər. Kənan, sən haraya və niyə getdiyini bilirdin. Demə ki, təqsirin yoxdur. Beş nəfər bir adama necə hücum edə bildiniz? Bu, kişilik deyil, insanlıq deyil. Müttəhimlər barəsində hökmün qüvvədə qalmasını və həkimlərin məsuliyyətə cəlb olunmasını istəyirəm".

Bu zaman yenə Samir Mustafayev yerindən qışqırıb: "Siz konkret olaraq məndən nə istəyirsiniz? Mən susuram və bir vicdanlı insanın çıxıb mənə "təqsirimi" deyəcəyini gözləyirəm. Artıq məni məhkəməyə gətirməyə bilərsiniz!".

   Hakim Mustafayevin sözünü kəsib və yenə vəkil Namazlıya söz verib, o, yenidən işin birinci instansiya məhkəməsinə qaytarılması zərurətini qeyd edib: "Müttəhimlər haqqında hökm dəyişdirilməlidir. İşin bir hissəsini təkrar istintaqa göndərmək, qalan hissəsini dəyişdirməmək absurddur".

   Söz yenidən Şəmsəddin Quliyevə verilib: "Görüntülərdə həqiqətən ekspert rəylərində göstərilən zədələr görünürsə, niyə Rasimi müayinə və müalicə etməyiblər? O, fasiləsiz olaraq jurnalistlərə müsahibə verirdi. Belə zədələrlə bunu etmək qeyri-mümkündür. Samirin ümumiyyətlə təqsiri yoxdur. Ona bəraət verməyi xahiş edirəm. Mən müşahidə kamerasını saniyəbəsaniyə izləmişəm və Rasim Əliyevə vurulan zərbələri saymışam. Elşən, Arif və Camal vurub, Samir isə yox. Həkimlər təqsirlidir, şübhəsiz. Rasim qan qusana qədər gözləmək lazım idi? Niyə yardım göstərmirdilər?

Daha sonra məhkəmə vəkil Rəsul Yusifbəyliyə söz verib. O, nitqə hazırlaşmaq üçün vaxt istəyib. Məhkəmə onun xahişini təmin edib və prosesi martın 12-nə təyin edib.

* Jurnalist Rasim Əliyev 2015-ci il avqustun 8-də döyülüb və növbəti gün xəstəxanada dünyasını dəyişib.

Cinayət işinin fiqurantları altı nəfər, o cümlədən futbolçu Cavid Hüseynovdur. 2016-cı il aprelin 1-də Bakıda məhkəmə Əliyevin qətli haqqında iş üzrə beş müttəhimi 9 ildən 13 ilədək azadlıqdan məhrum edib. Hüseynov barəsində iş ayrıca icraata ayrılıb. Futbolçu təqsirini boynuna almayıb. 2016-cı il mayın 31-də o, cinayət haqqında məlumat verməmək ittihamı ilə 4 il həbs cəzasına məhkum edilib, amma oktyabrın 12-də Apellyasiya Məhkəməsi bu müddəti 1 il 2 aya endirib və Hüseynov azadlığa çıxıb.