Tətil edən fəhlələrə tibbi sığorta vəd etdilər (video)

Saat 15:30 radələrində Dövlət Neft Şirkəti və “Bos Shelf” rəhbərliyinin əmək haqqının artırılması, sığortanın təmin edilməsi və s. tələbi ilə tətil edən fəhlələrlə görüşü başa çatıb.

Fəhlələrin Turan-a verdiyi məlumata görə, “Bos Shelf”in məxsus olduğu dövlət şirkəti onlara bütün problemlərin həll ediləcəyini vəd edib.

Öz növbəsində, “Bos Shelf”in rəhbəri İxtiyar Axundov isə qısa zaman ərzində maaşların artırılmasının mümkün olmadığını deyib. O, yerli işçilərin əcnəbilər tərəfindən alçaldılması faktlarının araşdırılacağını vəd edib.

Bundan sonra fəhlələr işə qayıtmağı qərara alıblar. -16D-

BOS SHELF müəssisəsində tətil

Bu gün dəniz neft platformaları istehsal edən BOS SHELF müəssisəsinin 800-ə yaxın işçisi əmək haqqının artırılması və tibbi sığorta ilə təmin olunma tələbi ilə tətilə başlayıb. 

Tətilçilərdən biri Turan-a bildirib ki, işçilərin əmək haqqı 500 manatdır və onlar əmək haqlarının 800-900 manatadək qaldırılmasını tələb edirlər. Mənbənin sözlərinə görə, müəssisənin xarici menecerləri 15-20-30 min manat alırlar.   

İşçilər həmçinin onlara tibbi sığortanın verilməsini tələb edirlər. Rəhbərlik onları işə başlamağı  razı salmağa çalışır, tələblərə baxılacağını vəd edir. 

“Ancaq biz buna inanmırıq və yüksək səviyyədə yazılı zəmanət tələb edirik”, - mənbə vurğulayıb.

Neftçilərin Hüquqlarını Müdafiə Komitəsinin rəhbəri Mirvari Qəhrəmanlı işçilərin tələblərini ədalətli hesab edir. Onun sözlərinə görə, neft sektoru işçilərinin əmək haqları demək olar ki, iqtisadiyyatın digər sahələrindən fərqlənmir.  

* Müəssisə Qaradağ rayonunda dərin özüllər zavodunun yaxınlığında yerləşir. Müəssisə 2001-ci ildə  SOCAR və Star Gulf Fzco  tərəfindən paritet əsaslarla yaradılıb. Hazırda səhmlərin 96%-dən çoxu SOCAR-a keçib. 16B06-