Tibbi Ərazi Bölmələrini İdarəetmə Birliyi: Həkimlər Oqtay Gülalıyevin sağalması üçün hər şeyi edirlər (YENİLƏNİB)

Bakı/27.04.21/Turan:  Tibbi Ərazi  Bölmələrini İdarəetmə Birliyi hüquq müdafiəçisi Oqtay Gülalıyevin ev şəraitində müalicəsinin təşkili üçün təhkim olunan tibb işçilərinə maaşlarının verilməməsi barədə məlumatı təkzib edib.

Qurumdan bildirilib ki,  Oqtay Gülalıyevin müalicəsi üçün 3 tibb bacısı və 3 kiçik tibb bacısı təhkim olunub.

Elmi-Tədqiqat Tibbi Bərpa İnstitutunun baş həkimi Nizami Nəbiyev bildirib ki, tibb bacılarına dövlət tərəfindən tənzimlənmiş əmək haqları hər ay ödənilir. “Oqtay Gülalıyevin normal həyata geri dönə bilməsi və ayağa qalxması üçün həkimlərimiz əllərindən gələni edirlər"- Nizami Nəbiyev bildirib.06D-

*   *   *

2021 Aprel 27 (Çərşənbə axşamı) 14:17:20

Oqtay Gülalıyevin vəziyyəti xeyli yaxşılaşıb, lakin...

Bakı/27.04.21/Turan: Hüquq müdafiəçisi Oqtay Gülalıyevin səhhətində ciddi irəliləyiş müşahidə olunur.

“Atam artıq suallarımızı diqqətlə dinləyir, onlara jestlərlə reaksiya verir. O dinlədiyi xəbərlərə də şüurlu şəkildə reaksiya verir. Əlləri ilə bizə işarələr verir, nəsə deməyə çalışır",- Təbriz Gülalıyev Turan agentliyinə bildirib.

Onun sözlərinə görə, fəalın vəziyyətinin yaxşılaşmasında Heydər Əliyev Fondunun maliyyə yardımı ilə Türkiyədə həyata keçirilən 4 cərrahiyyə əməliyyatı böyük rol oynayıb.

"Qəzadan sonra atamın sağ qalma şansı ancaq 20 faiz idi. Türkiyədə əvvəlcə bizə deyirdilər ki, komadan ayılma şansı azdır. Lakin bu gün tam əminliklə deyə bilərəm ki, müalicə nəticəsində atam artıq komadan çıxıb", - hüquq müdafiəçisinin oğlu davam edib.

Onun sözlərinə görə, Oqtay Gülalıyevin normal həyata tam qayıtması və ayağa qalxması üçün uzunmüddətli fiziki-terapevtik müalicəyə və dərman qəbuluna ehtiyac var.

Lakin hüquq müdafiəçisinin müalicəsinə yardım edən tibb bacılarına Tibbi Ərazi Bölmələrinin İdarəetmə Birliyində artıq 3 aydır əmək haqqı verilmədiyindən onlar mayın 1-dən  onlar öz funksiyalarını yerinə yetirə bilməyəcəklər.

Bundan əlavə, onun sözlərinə görə, artıq beş aydır ki, heç bir dövlət qurumu dərmanların alınmasına kömək etmir.

"Ona görə də bizim lazımi dərmanların alınması ilə bağlı narahatlığımız var. Təəsüf ki, tibb bacılarının gedişi bizim vəziyyətimizi çətinləşdirəcək", - Gülalıyev deyib.

Tibbi Ərazi Bölmələrinin İdarəetmə Birliyindən şərh almaq mümkün olmayıb.

Oqtay Gülalıyev 29 oktyabr 2019-cu il tarixində Bakının mərkəzində piyada keçidində avtomobillə vurulub. O, xəstəxanaya çatdırılıb, lakin əməliyyat yalnız 30 oktyabrda Respublika Neyrocərrahiyyə Xəstəxanasının cərrahları tərəfindən özəl klinikada aparılıb.

Yanvarın 25-də Nəsimi Rayon Məhkəməsi hüquq müdafiəçisi Oqtay Gülalıyevin səhhətinə ciddi ziyan vurmuş Kənan Abdullayevi 2 il 3 ay müddətinə azadlıqdan məhrum edib. Məhkəmə onu Cinayət Məcəlləsinin 263.1.-1- ci maddəsilə   (yol hərəkəti və nəqliyyat vasitələrinin istismarı qaydalarının pozulması, ehtiyatsızlıq üzündən zərərçəkmiş şəxsin sağlamlığına ağır ziyan vurduqda) təqsirli bilib. Bundan əlavə, Abdullayev üç il müddətinə avtomobil sürmək hüququndan məhrum edilib. —21D-