Tikinti materialları bazarında baş vermiş yanğında bir nəfər həlak olub

Bakı/23.11.23/Turan: Noyabrın 23-də səhər tezdən Bakının Dərnəgül şossesində tikinti materialları bazarında yanğın baş verib.

Baş Prokurorluğun və Fövqəladə Hallar Nazirliyinin birgə bəyanatında deyilir ki, yanğın zamanı ticarət obyektlərinin içindəki müəyyən miqdarda taxta yanıb. Eyni zamanda, sahibkar Razi Qasımov (1962-ci ildə anadan olub) həlak olub.

Texniki vasitələrin və yanğınsöndürənlər cəlb edilməklə yanğının söndürülməsi tədbirləri davam edir.

Faktla bağlı Cinayət Məcəlləsinin 225.2-ci (yanğın təhlükəsizliyi qaydalarının pozulması) maddəsilə cinayət işi başlanıb. Yanğının səbəbini və zərərin miqdarını müəyyən etmək üçün məhkəmə yanğın-texniki və əmtəə ekspertizaları, həmçinin Razi Qasımovun ölümünün səbəbini müəyyən etmək üçün məhkəmə-tibbi ekspertizası təyin edilib.

Hazırda zəruri istintaq-əməliyyat tədbirləri davam edir", - məlumatda deyilir. -0-