Tofiq Yaqublu hər an komaya düşə bilər

Bakı/12.09.20/Turan: Müxalif siyasətçi Tofiq Yaqublu 3 saylı Şüvəlan İstintaq Təcridxanasında 11 gündür aclıq aksiyasını davam etdirir.

Qızı Nigar Həzinin sözlərinə görə, o, bu gün atası ilə telefonla danışıb. “O, səhər tezdən zəng edəcəkdi, amma onun zənglərini dinləyən əməkdaş hələ işə gəlmədiyinə görə rəhbərlik zəng etməyə icazə verməyib”, deyə Nigar qeyd edib.

Yaqublu ailə üzvləri ona görə narahat olduqları üçün İstintaq Təcridxanası rəhbərliyindən ailəsi ilə gündə iki dəfə danışmaq imkanı verilməsini tələb edib.

“Burada digər məhbuslara isə gündə 2-3 dəfə zəng imkanı yaradıqları halda və hətta belə durumda belə mənə qarşı qərəz göstərirlər”, deyə Nigar atasının sözlərini çatdırıb.

Yaqublu həmçinin qeyd edib ki, dünən həkim Adil Qeybulla onu sistemin qida tərkibli olmadığına inandırdıqdan və sistemi şəxsən özü köçürəcəyini dedikdən sonra o, sistem köçürülməsinə razılıq verib.

İstintaq Təcridxanasının həkimləri də Yaqubluya hər an komaya düşə biləcəyini deyiblər.

“Sistem köçürülməsindən sonra da dəyişən heç nə olmadı. Yenə gecə səhərə kimi yatmamışam. Çox halsızam. Dəhşətli baş ağrılarım və başgicəllənmələrim var. Buradakı həkimlər də həyəcan içindədirlər. Mənim hər an komaya düşəcəyimdən qorxurlar. Hər gün sürətlə geriyə doğru gedirəm”, deyə Yaqublu bildirib.

O, onu dəstəkləyən hər kəsə minnətdarlığını bildirib, deyə Nigar qeyd edib.

Xatırladaq ki, Demokratik Qüvvələrin Milli Şurasının və Müsavat Partiyasının üzvü Tofiq Yaqublu sentyabrın 3-də 4 il 3 ay müddətinə azadlıqdan məhrum edilib. O, həbsdə aclıq aksiyasına başlayıb və 11 gündür aksiyanı davam etdirir.

Beynəlxalq təşkilatlar hökmü pisləyib. “Beynəlxalq Amnistiya” onu “vicdan məhbusu” kimi tanıyıb. -06D-