Turan Agentliyi ƏƏSMN-i qanuna hörmət etməyə çağırır

Bakı/13.05.20/Turan: Əmək və Əhalinin Sosial Müdafiəsi Nazirliyi AR Konstitusiyasının 50-ci maddəsini və AR "KİV haqqında" Qanununun ən gec 24 saat ərzində informasiya vermək öhdəliyi müəyyən edən 8-ci maddəsini, AR "İnformasiya əldə etmək haqqında" Qanununun informasiya sorğusunun cavabdeh tərəfindən ən qısa müddətdə, lakin 7 iş günündən gec olmayaraq icra edilməsini nəzərdə tutan 24.1-ci maddəsini kobud şəkildə pozub.

Turan İnformasiya Agentliyi 2020-ci il aprelin 29-da ƏƏSMN-ə qanunvericiliyə uyğun olaraq Nazirlər Kabinetinin 7 aprel 2020-ci il tarixində təsdiq etdiyi Fəaliyyət Planının icrası ilə bağlı informasiya sorğusu göndərib. Fəaliyyət Planında elektron formada işsiz kimi qeydiyyatdan keçmiş şəxslərə aprel-may aylarında hər ay üçün aylıq yaşayış minimumu ölçüsündə (190 manat) birdəfəlik yardım ödənilməsi nəzərdə tutulur.

Agentlik birdəfəlik yardım üçün ərizə verən vətəndaşların bəzilərinin AR "Məşğulluq haqqında" Qanununun 4.1.3-cü maddəsinə əsasən əsassız olaraq imtina cavabı aldıqları barədə məlumat əldə edib.

İnformasiya sorğusunda imtina cavabı alan konkret vətəndaşın adı göstərilib.

Sorğu nazirliyə poçt vasitəsilə yazılı formada göndərilib və çatdırılıb, nazirliyin nümayəndəsi tərəfindən qəbul edilib.

İnformasiya sorğusunda agentlik nazirlikdən aşağıdakı suallara cavab verməyi xahiş edib:

1. Birdəfəlik ödənişdən niyə imtina olunub? (Zəhmət olmasa, əsaslandırın).

2. 2020-ci ilin aprel ayında neçə nəfər birdəfəlik ödəniş alıb?

3. Neçə nəfərə birdəfəlik yardım ödənilməsindən imtina edilib?

4. Nə qədər birdəfəlik ödənişdən əsassız imtina halı aşkar edilib?

Bu informasiya sorğusu göndərildikdən sonra agentliyə daha iki vətəndaşdan əsassız imtina haqqında ərizə daxil olub.

Turan Agentliyi əmək və əhalinin sosial müdafiəsi naziri Sahil Babayevdən informasiya sorğusuna cavab verilməsi tapşırığı verməyi xahiş edir.

Nazirlik qanunun tələblərini icra etməsə, agentlik müxtəlif dövlət qurumlarından olduğu kimi, nazirlikdən də məhkəmə qaydasında cavab almağa çalışacaq.

"Məhkəmə qaydasında cavab alınmasına bir il vaxt gedir. Bu, məhkəmələrin çox vaxt dövlət qurumlarının vəkilləri kimi çıxış etməsindən və qəsdən prosesləri uzatmasından irəli gəlir. Amma biz əksər hallarda cavaba nail oluruq. Hazırda biz informasiya sorğusuna cavab verməkdən imtina edən Nazirlər Kabinetinə qarşı Avropa Məhkəməsinə iddia hazırlamışıq. Bu pozuntuya bütün milli məhkəmə instansiyaları tərəfindən bəraət verilib", deyə Turan İnformasiya Agentliyinin direktoru Mehman Əliyev bildirib.

Agentlik həmçinin xatırladır ki, qanunla nəzərdə tutulan məlumatların verilməsindən imtinaya AR "Korrupsiyaya qarşı mübarizə haqqında" Qanununun 9.3.8-ci maddəsinə əsasən, korrupsiya ilə bağlı hüquqpozma kimi baxılır.–0-