Ukrayna istehsalı olan diabetik dərmanlar azərbaycanlı mütəxəssislərdə narahatlıq yaradıb

Bakı/0.02.18/Turan: Azərbaycan Diabet Liqası (ADL) ictimai təşkilatı Ukraynanın "İndar" əczaçılıq şirkətinin istehsal etdiyi Humodar 100R, Humodar B100R və Humodar C25 100R diabetik dərman preparatları ilə bağlı Səhiyyə Nazirliyinin Analitik Ekspertiza Mərkəzinə rəsmi məktubla müraciət edib.

Azad İstehlakçılar Birliyi (AİB) ictimai təşkilatı məktubu təhlil edərək belə nəticəyə gəlib ki, dərmanların qablaşdırmadakı müxtəlif xarakteristikasına və rənglərin müxtəlifliyinə (Humodar B100R - qırmızı rəng, Humodar R100R -yaşlı rəng) baxmayaraq, hər iki dərman preparatının seriya nömrəsi eynidir. Dərmanların heç birinin üzərində istehsal tarixi göstərilməyib, AİB-in rəhbəri Eyyub Hüseynov Turan-a bildirib.

O qeyd edib ki, bu preparatların heç biri Avropa Dərman Agentliyi və ABŞ Dərmanlara və Yeyinti Məhsullarına Nəzarət Administrasiyası kimi beynəlxaq qurumların sertifikatlaşdırmasından keçməyib. "Bütün bunlar dərmanın keyfiyyətilə bağlı istehlakçılarda şübhə yaradır, çünki həyat və sağlamlıq üçün təhlükəli ola bilər", - o bildirib.

Braziliyanın sanitar-təftiş təşkilatının baş direktorunun həmin preparatlara dair 11. 10. 2017-ci il tarixli RE-2.711 saylı xülasəsində deyilir: "Qabaqcıl istehsalat praktikasına uyğun deyil" (linkə bax: http: //www.in.g o. b r / a u t e n t i c e d e d. h t m l, həmçinin 0001201710160 0 2 11 kodu üzrə baxmaq olar).

Həyat üçün təhlükəli olan preparatların istehsalının qarşısının alınmasına dair təkliflər Ukrayna Radasının Antikorrupsiya Komitəsinin sədri Yeqor Viktoroviç Soblevə ünvanlanıb. AİB həmin dərmanların pərakəndə şəbəkəyə necə düşməsinə və Azərbaycan Səhiyyə Nazirliyi tərəfindən icazə verilməsinə təəccüb edir. --0-