Valideynlər oğullarının daxili orqanlarının satılmaq üçün çıxarıldığını iddia edirlər

Hərbi xidmətdə müəmmalı şəkildə ölən əsgər İsmayıl İbayevin valideynləri çərşənbə günü RATİ-də mətbuat konfransı keçiriblər.

Hüquq müdafiəçisi Ələkbər Məmmədov 4 ay öncə Naxçıvana hərbi xidmətə gedən əsgərin meyitinin göndərildiyini bildirib. İ.İbayev ailəsinin Cəbrayıldan qaçqın düşdüyü Biləsuvar rayonunda dəfn edilib. Ölümlə bağlı Müdafiə Nazirliyi rəsmi olaraq əsgərin avtomatdan yaxın məsafədən atəş açıb özünü güllələyərək intihar etdiyini bildirir. Amma əsgər ailəsi əsgərin daxili orqanlarının satılması məqsədilə qətlə yetirildiyini nəzərə çatdırır. Ailə əsgərin ölümünün intihar nəticəsində yox, qətl nəticəsində baş verdiyini bildirirlər.

Meyit torpağa qoyulmazdan öncə yuyularkən İ.İbayevin atası oğlunun daxili orqanlarının olmadığını görüb. Bundan sonra ailə meyitin ekskumasiya olunmasını tələb edib. Eyni zamanda, ölkənin hərbi prokurorluğuna müraciət edərək faktın araşdırılmasını istəyib. Ekspertlərin iştirakı, valideyn və qohumların gözü önündə meyitin dəfninin 39-cu günü ekspertiza keçirilib. Amma ekspertlər nə üçünsə “daxili orqanların çürüməsi” kimi rəy veriblər. Ekspertiza keçirilən zaman Biləsuvar polisi qəbirstanlığa yeridilib. Həm də ekspertizadan dərhal sonra polis əməkdaşları qəbrin üstünü sementlə qapatmaq istəyiblər. Amma əsgərin valideynləri, yaxınları buna imkan verməyiblər. Onlar mətbuat konfransında cinayətin üstü açılana kimi neçə dəfə lazım olacaqsa, ekskumasiyaya hazır olduqlarını söyləyiblər. 

Valideynlər ekspertizanın verdiyi rəyi əsassız sayıblar. Onların fikrincə, bütün bu saxta rəylər məhz qətl, daxili orqanların çıxarılması faktını ört-basdır etmək üçündür. Valideynlərə görə, övladının daxili orqanları satılmaq üçün çıxarılıb. Mətbuat konfransında əsgərin anası deyib ki, Cəbrayıl rayon icra hakimiyyətinin başçısı Məmməd Quliyev və rayon səfərbərlik idarəsinin başçısı susmaları üçün ailəyə rüşvət təklif edib. 

Telefon vasitəsilə Fransadan konfransa qatılan Rahim Namazov adlı şəxs vaxtilə Naxçıvan hərbi prokuroru Yaşar Həsənovun sürücüsü olduğunu deyib. R.Namazov əsgərlərin daxili orqanlarının çıxarılması kimi faktın ilk dəfə baş vermədiyini söyləyib. Y.Həsənov bir neçə il öncə kefli halında R.Namazova “dünən yata bilməmişəm, filan əsgər yuxuma girib, böyrəklərimi ver deyirdi, elə bil itdir iy bilir ki, böyrəkləri məndədir”, - deyə bildirib. Eyni zamanda, Gənədə xidmət etmiş Spartak adlı zabitin də belə tale yaşadığını nəzərə çatdırıb. 

Azərbaycanın adının “qara transplantasiya” məsələsində beynəlxalq miqyasda hallandığını deyən R.Namazov baş verənləri bu şəbəkənin əməli  kimi dəyərləndirib. 

Mətbuat konfransında həqiqətin üzə çıxması üçün həm əsgərin ölümü, həm də daxili orqanlarının çıxarılması faktı ilə bağlı cinayət işi başlanması önə çəkilib, bu cinayət işinin Müdafiə Nazirliyi və ölkə rəhbərliyinin nəzarətində saxlanması təklif edilib. -05C-