Vəkil: «3günə almalı olduğum qərarı 11 gündür ki, ala bilmirəm»

Bakı/20.09.16/Turan: “Rüfət Səfərovla bağlı məhkəmə hökmünün üstündən 11 gün keçsə də hələ də hökmü ala bilməmişəm”, - R.Səfərovun vəkili Bəhruz Bayramlı “Azadlıq” radiosuna bildirib.

Vəkil deyib ki, qanuna əsasən hökm üç gün ərzində qarşı tərəfə təqdim edilməlidir: “Amma dediyim kimi, 11 gündür ki, Lənkəran Ağır Cinayətlər üzrə Məhkəmədən hökmü ala bilmirik. Nə qədər müraciət edirik, xeyri yoxdur”.   

B.Bayramlı deyib ki, bu durumla bağlı Ədliyyə Nazirliyinə, Məhkəmə Hüquq Şurasına teleqramla müraciət edərək mövcud vəziyyəti anladıb.

Onun sözlərinə görə, qərarın verilməməsinin məsələnin sonrakı məhkəmə perspektivinə mənfi təsiri də var: “Bu qərar 20 gün ərzində verilməsə və biz də bu qərara arxayın olub apellyasiya şikayəti verməsək müddət keçdiyi üçün sonrakı şikayətimiz tanınmayacaq, beləliklə, məhkəmə qərarı qüvvəyə minəcək”.

Vəkil bundan irəli gələrək ilkin apellyasiya şikayətilə Şirvan Apellyasiya Məhkəməsinə müraciət etdiyini bildirib. Qərarı aldıqdan sonra isə təfərrüatlı şikayət verəcəyini söyləyib.

R.Səfərov Zərdab Rayon Prokurorluğunun keçmiş müstəntiqi olub. 2015-ci il dekabrın 20-də hüquq-mühafizə sistemindəki qanunsuzluqlara etiraz olaraq bəyanatla prokurorluq orqanını tərk etdiyini bildirib. 2015-ci il dekabrın sonlarında saxlanılıb. Binəqədi Rayon Məhkəməsi R.Səfərovu təkrar rüşvət almaqda təqsirli bilərək barəsində 3 ay 26 gün müddətinə həbs qətimkan tədbiri seçib. 2016-cı il yanvarın 22-də həbs qətimkan tədbiri ev dustaqlığı ilə əvəz edilib. 2016-cı il sentyabrın 8-də  9 il müddətinə azadlıqdan məhrum edilib.

R.Səfərov keçmiş YAP-çı deputat,   Müdafiə Nazirliyinin mətbuat xidmətinin keçmiş rəhbəri Eldar Sabiroğlunun oğludur. -0-