Elmar Məmmədyarov: «Bu, uğurlu təcrübədir»

Bakı/20.09.16/Turan:  Azərbaycanın xarici işlər naziri Elmar Məmmədyarov İslam Əməkdaşlıq Təşkilatının (İƏT) Ermənistanın Azərbaycana qarşı təcavüzünə dair Kontakt Qrupunun ilk iclasında çıxış edib.

O, Kontakt Qrupunun ilk iclasını təşkil etdiyinə və iclasa sədrliyə görə baş katib  İyad Amin Mədəniyə təşəkkürünü bildirib. Nazir İƏT Kontakt qruplarının təsis edilməsini İƏT-ə üzv dövlətlərin təşkilat üçün mühüm əhəmiyyətə malik məsələlərə daha çox diqqət yetirməsi baxımından uğurlu təcrübə adlandırıb:

“Bu baxımdan mən inanıram ki, bu Kontakt Qrupunun iclasları Ermənistan-Azərbaycan münaqişəsi ilə bağlı Azərbaycanın Dağlıq Qarabağ regionu və ətraf ərazilərindəki son vəziyyət barədə İƏT dövlətlərini məlumatlandırmaq və münaqişənin nizamlanması prosesinə İƏT-in mümkün töhfələrinə dair fikir mübadiləsi aparmaq üçün fürsət olacaq”, - nazir bildirib.

O,          daha sonra Ermənistanın Azərbaycana qarşı müharibəyə başladığını, Dağlıq Qarabağ və ətraf 7 rayonu işğal etdiyini, etnik təmizləmə apardığını nəzərə çatdırıb.

Nazir vurğulayıb ki, beynəlxalq ictimaiyyət dəfələrlə Azərbaycana qarşı  hərbi güc tətbiqini və nəticə olaraq ərazilərinin işğalını pisləyib. 1993-cü ildə BMT Təhlükəsizlik Şurası Azərbaycana güc tətbiqini və ərazilərinin işğalını qınayan 4 qətnamə qəbul edib. (822 (1993), 853 (1993), 874 (1993) və 884 (1993). 2004-cü ildən etibarən “Azərbaycanın işğal edilmiş ərazilərində vəziyyət” adlı xüsusi bənd BMT Baş Assambleyası sessiyalarının gündəliyinə daxil edilib.

E.Məmmədyarov Kontakt Qrupunun üzvlərinə bildirib ki, Ermənistan və Azərbaycan arasında münaqişə baş verdikdən sonra İƏT BMT Təhlükəsizlik Şurasının uyğun qətnamələrinə əsaslanaraq Ermənistanı təcavüz adlandırıb. Nazir bu münaqişənin başlamasından 24 il keçsə də nəticə olmadığını deyib: “Silahlı münaqişənin başlanmasından iyirmi dörd il keçir. Buna baxmayaraq, BMT Təhlükəsizlik Şurası və Baş Assambleyasının qətnamələrinə, İƏT və digər beynəlxalq təşkilatların qərarlarına və ayrıca dövlətlərin mövqelərinə məhəl qoymayaraq Ermənistan Azərbaycan ərazilərini qanunsuz şəkildə işğal altında saxlamaqda davam edir”.

Sonda E.Məmmədyarov İƏT-in Kontakt Qrupuna uğurlu başlanğıc və məhsuldar müzakirələr arzulayıb. –0--