Vəkil hesab edir ki, Seymur Həzi qanun çərçivəsində özünü müdafiə edib

  Bu gün Sumqayıt Apellyasiya Məhkəməsində  “Azadlıq” qəzetinin əməkdaşı və “Azərbaycan saatı” proqramının aparıcısı Seymur Həzinin apelyasiya şikayətinə baxılıb. O, xuliqanliqda ittiham olunur.

Məhkəmə  şikayəti təmin etməyib,  Abşeron Rayon Məhkəməsinin qərarını qüvvədə saxlayıb. Bu barədə Turan-a vəkil Elton Quliyev bildirib. Onun sözlərinə görə, S.Həzi müdafiə tərəfinin vəsatətinə baxmayaraq, məhkəməyə aparılmayıb.

S.Həzi avqustun 29-da Ceyranbatan qəsəbəsində həbs olunub. Məhərrəm Həsənov adlı şəxs ona hücum edib. Jurnalist özünü müdafiə edərkən onu su şüşəsi ilə vurub.  Hadisə yerinə dərhal polis gələrək S.Həzini saxlayıb. Ona hücum edən şəxs isə bir həftədən sonra buraxılıb.

Vəkil hesab edir ki, S.Həzinin hərəkətlərində cinayət tərkibi yoxdur, özünümüdafiə isə xuliqanlıq kimi tövsif edilə bilməz.

“Seymur Həzi özünümüdafiə çərçivəsində hərəkət edib və onu aşmayıb. CM-in 36-cı maddəsi məsuliyyətdən azad edir, çünki güc zəruri müdafiə ilə bağlı tətbiq edilib”, - vəkil bildirib.

Müdafiə tərəfi həbsin ev həbsi ilə əvəzlənməsi və s. barədə yeni vəsatətlər qaldırmaq niyyətindədir.-16D06-