Vəkil: «Jurnalist Əfqan Sadıqovun işi üzrə ittihamın versiyası boşa çıxır»

Dekabrın 1-də Cəlilabad Rayon Məhkəməsində jurnalist Əfqan Sadıqovun işi üzrə məhkəmə iclası keçirilib.

Azel.tv saytının təsisçisi və redaktoru A.Sadıqov noyabrın 22-də saxlanılıb və ona qarşı CM-in 127.2.3-cü maddəsi (xuliqanlıq niyyəti ilə təhlükəli üsulla sağlamlığa qəsdən az ağır ziyan vurma) maddəsi ilə ittiham irəli sürülüb.

Söhbət avqustda rayon İcra Hakimiyyətinin binasında baş vermiş insidentdən gedir. Həmin vaxt dəhlizdə bir qadın ona yumruqla hücum edib, polis dərhal insidenti sağlamlığa ziyan vurma kimi protokollaşdırıb.

Vəkil Elçin Sadıqov  Turan-a bildirib ki, jurnalistin sözlərinə görə, ona qarşı təxribat törədilib və o, öz peşə fəaliyyətinə görə təqib edilir.

Sonra zərərçəkən Aliyə Rzayeva danışıb.

O bildirib ki, guya avqustun 9-da saat 10:00-a yaxın Cəlilabad Rayon İcra Hakimiyyəti başçısının qəbulunda jurnalist onu vurub və o, huşunu itirib, bir neçə saatdan sonra özünə gəlib.

Zərərçəkənin sözlərinə görə, onu mərkəzi rayon xəstəxanasına aparıblar, yeddi gün müalicə alıb.

Lakin xəstəxanın qeydiyyat kitabında qeyd olunur ki, A.Rzayeva avqustun 9-da saat 15:30-da daxil olub.

Bundan əlavə, cinayət materiallarında zərərçəkənin ifadə verdiyi tarix avqustun 9 kimi göstərilir və altında qadının imzası var.

“O, huşsuz vəziyyətdə necə imza çəkə bilərdi?”, - vəkil sual edib.

Dekabrın 1-də proses zamanı 6 şahiddən 4-nün ifadəsi dinlənilib. Onların hamısı İcra Hakimiyyətinin məsul vəzifəli şəxsləri olub.

Müdafiə tərəfinin suallarına cavab verən şahidlər qəbul otağında videokameranın olduğunu təsdiqləyiblər. İcra başçısı bunun vasitəsilə baş verənləri izləyə bilər.

Lakin materiallarda avqustun 9-u üçün video qeydlərə baxış haqda məlumat yoxdur ki, bu da həqiqəti müəyyən etməyə kömək edər.

Vəkilin sözlərinə görə, jurnalistin işi üzrə ittihamın versiyası boşa çıxır.

Növbəti iclas dekabrın 14-ü saat 10.00-a təyin edilib.—06B--