Vəkil: Leyla Yunus başına vurduqlarını iddia edir

Vəkil Elçin Qəmbərov bu gün Kürdəxanı istintaq təcridxanasında müvəkkili Leyla Yunusla görüşməyə müvəffəq olub.

Bundan sonra vəkil jurnalistlərə hüquq müdafiəçisi döyüldükdən sonra vəziyyətinin ağır olduğunu bildirib.

“Onun başında güclü ağrılar var, çətinliklə danışır, uzun fasilələr verir və yaddaşını qismən itirib. O deyib ki, mayor Yaqubov iki dəfə başından güclü zərbə endirib. Bundan sonra o, çox şeyi xatırlamır, baş ağrıları isə getdikcə güclənir. Görünür başında hematoma var. Qeyd etmək lazımdır ki, bu yaxınlarda o, hər iki gözündən əməliyyat olmuşdu və başına güclü zərbə dəyməsi kor olmasına səbəb ola bilər”, deyə vəkil “Azadlıq” radiosuna bildirib.

Xatırladaq ki, çərşənbə axşamı Yunusun beş vəkili onun istintaq təcridxanasının nəzarətçisi tərəfindən vəhşicəsinə döyüldüyünü, onun hüquq müdafiəçisini yerlə sürüdüyünü və böyründən və başından zərbələr endirdiyini bəyan ediblər. Növbəti gün Penitensiar Xidmət bunun yalan olduğunu bildirib.

Leyla Yunus və həyat yoldaşı Ermənistanın xeyrinə casusluqda ittiham olunurlar. O, iyulun 30-da, həyat yoldaşı Arif isə beş gün sonra həbs edilib.

Onlar beynəlxalq ictimaiyyət tərəfindən vicdan məhbusu kimi tanınıb. Onların həbsinin əsl səbəbi Azərbaycanda siyasi məhbuslar haqqında informasiya dərc etməkdən və hakimiyyətin korrupsiya və digər cinayətlərini ifşa etməkdən ibarətdir. -16D-