Vəkil Natiq Cəfərlinin yanına buraxılmır

Vəkil Elçin Sadıqov müdafiə etdiyi şəxsin, REAL Hərəkatının icraçı katibi Natiq Cəfərlinin yanına buraxılmır. Bu barədə Turan-a vəkil özü məlumat verib.

Vəkil N.Cəfərlinin müdafiəsinə avqustun 15-də qoşulub və N.Cəfərlinin müdafiəsi ilə bağlı orderin əslini və digər lazımi sənədləri Baş Prokurorluğa təqdim edib. Bununla belə, Ağır Cinayətlər üzrə İstintaq İdarəsi onunla görüşə icazə vermir.

E.Sadıqov prokurorluğun hərəkətini qanunsuz hesab edir və E.Cəfərlinin müdafiə hüququnun kobud şəkildə pozulduğunu bildirir.

““Müstəntiq mənə deyir ki, guya sənədlərim prokuroluğa çatmayıb, halbuki əlimdə qəbz var ki, sənədlər prokuroluğa çatıb. Bu, müdafiə hüququnun  ciddi şəkildə pozulmasıdır”, - E.Sadıqov bildirib.

Penitensiar Xidmətdən Turan-a  bildiriblər ki, təcridxanalarda və cəzaçəkmə müəssisələrində məhbuslara baş çəkmək üçün müvafiq sənədləri olan vəkillərə heç bir maneə yoxdur.

Baş Prokurorluqdan şərh almaq mümkün olmyıb.

N.Cəfərli avqustun 13-ü gecə saatlarında həbs edilib. Ayın 14-nə keçən gecə Nəsimi Rayon Məhkəməsi onun barəsində 4 aylıq həbs qətimkan tədbiri seçib. N.Cəfərliyə qarşı vergidən yayınma, qanunsuz sahibkarlıq ittihamları irəli sürülüb.

N.Cəfərli ittihamları rədd edir. REAL Hərəkatı bu itithamları qondarma adlandıraraq həbsi REAL Hərəkatına təzyiq kimi qiymətləndirir. —06В-