Vəkilə görə, Apellyasiya şikayətinin nəticəsi gələn həftə məlum ola bilər

AMAY Şirkətlər qrupunun prezidenti Abdulla Abdullayevin məhkəmə duruşması ilə bağlı Bakı Apellyasiya Məhkəməsinin qərarı gələn həftə məlum ola bilər. Bu haqda Turan-a A.Abdullayevin vəkili Osman Kazımlı bildirib.

Məhkəmə prosesi yanvarın 29-da başlayıb. Məhkəmə işə başlayan kimi Əfqan Hacıyev hakimi olduğu məhkəmə heyətinə etiraz edib. Hakim heyətinin etirazı baxılması üçün Bakı Apellyasiya Məhkəməsinə göndərilib. Apellyasiya Məhkəməsinin gözlənilən qərarından asılı olaraq məhkəmə prosesinə Ə.Hacıyevin və ya başqa hakimin rəhbərlik edəcəyi müəyyən olacaq.

Hakimin bu addımı atmasına səbəb A.Abdullayevin cinayət işində Elşən Novruzovun və daha iki nəfərin adının hallanmasıdır. Eyni ittihamlarla E.Novruzov və daha iki nəfər 2011-ci ildə Ə.Hacıyevin hakimliyi ilə mühakimə olunub. E.Novruzov və daha iki nəfər uzunmüddətli azadlıqdan məhrum edilmə cəzası alıblar.  Bakı Apellyasiya Məhkəməsi isə qərarı əsassız sayaraq, cəzaları şərti cəzalarla əvəz edib. Odur ki, hakim Ə.Hacıyev bir dəfə məhkəmə qərarı çıxardığı cinayət işi üzrə təkrar məhkəmə prosesinə çıxması ilə bağlı özünün də daxil olduğu tərkibə etiraz edib.

A.Adullayev 2014-cü il aprelin 4-də həbsə alınıb. Ona qarşı dələduzluq, vəsaitdən təyinatı üzrə istifadə etməmək, külli miqdarda mənimsəmə, səlahiyyətindən sui-istifadə ittihamları irəli sürülüb. A.Abdullayev irəli sürülən itithamları qəbul etməyərək onları əsassız, qondarma və uydurma adlandırır. -05B-