Vətəndaş Cəmiyyəti Müdafiə Komitəsi jurnalistin ölümü ilə bağlı hökumətə müraciət edib

Bu gün Helsinki Vətəndaş Assambleyasının ofisində Vətəndaş Cəmiyyəti Müdafiə Komitəsinin üzvləri fiziki zorakılıq nəticəsində avqustun 9-da xəstəxanada vəfat etmiş jurnalist Rasim Əliyevlə bağlı vətəndaş cəmiyyətinin hökumətə müraciəti müzakirə edilib. 

Müzakirələrdə jurnalistlərə qarşı zorakılığın ölkədəki cəzasızlıq mühitinin hökm sürməsinin səbəb olduğu vurğulanıb.

“Azərbaycan hakimiyyəti azad medianın, jurnalistlərin təhlükəsiz şəraitdə işləməsini müdafiə etdiyini bəyan edir.  Jurnalist Rasim Əliyevin döyülərək xəstəxanada vəfat etməsi hakimiyyətin öz maraqlarını müdafiə edə bilməməsinin sübutudur. Bu günlərdə jurnalist Tapdıq Fərhadoğlu və digər jurnalistlər Bakı Ağır Cinayətlər Məhkəməsinin qarşısında zorakılığa məruz qaldı hələ də rəsmi orqanların reaksiyası yoxdur”,- Turan agentliyinin direktoru Mehman Əliyev qeyd edib.

Azərbaycanda jurnalistlərə qarşı olan cinayətlərin cəmi 2-3 faizi açılıb. “Bu  cinayətləri isə əsasən jurnalistlərin özləri açıb”, - o qeyd edib.

Müzakirələrdə hətta prezidentin jurnalistin öldürülməsinə kəskin reaksiya verməsinə baxmayaraq,   dəfn mərasimində Prezident Administrasiyasının,  Mətbuat Şurasının üzvlərinin  iştirak etməməsi kəskin pislənilib. 

Jurnalistin ölümü ilə bağlı siyasi qətl, hakimiyyətdaxili qruplaşmaların mübarizəsi və kriminal hadisə kimi versiyalar irəli sürülüb. 

“Bu, rejimin cinayətidir. Biz sona qədər mübarizə aparmalıyıq ki, Elmar Hüseynovun, Rafiq Tağının, Rasim Əliyevin qatilləri və sifarişçilər cəzalandırlsın. Biz Rafiq Tağı və Rasim Əliyevi öldürən səhiyyə sisteminə qarşı sonarək mübarizə aparmalıyıq”,- jurnalist Xaliq Bahadır qeyd edib.

İdman Azərbaycanda siyasi şouya çevrilib. Eyni zamanda, ölkədə elə şərait yaradılıb ki, hər gün nəsə bir hadisə baş verir. “Etdiyi cinayətə  görə insanlar cəzalandırlımır. Bununla hökumət göstərir ki, nə istəsə  edə bilər. Biz elə etməliyik ki, Rasim Əliyevin qətli ilə bağlı cinatət işinin taleyi Elmar Hüseynovun qətli ilə bağlı cinayət işinin taleyi kimi olmasın”,- Helsinki Vətəndaş Assambleyasının həmsədri Arzu Abdullayeva qeyd edib.

Vətəndaş Cəmiyyəti Müdafiə Komitəsi müzakirələrin yekunu olaraq hökumətə müraciət qəbul edib.

Vətəndaş Cəmiyyəti Müdafiə Komitəsi 2009-cu ildə təsis edilib.-03C-