Müsavat Partiyası: Rasim Əliyevin ölümünə görə hakimiyyət məsuliyyət daşıyır

Müsavat Partiyası jurnalist Rasim Əliyevin ölümü ilə bağlı bəyanat yayıb. Bəyanatda deyilir: “Jurnalist Rasim Əliyevin sosial şəbəkədə yazdığı tənqidi fikirlərə görə bir qrup şəxs tərəfindən vəhşicəsinə döyülərək öldürülməsi Azərbaycan cəmiyyətini sarsıdıb.

Bu hadisə Azərbaycanda söz azadlığına qarşı dözümsüszlük mühitinin acı nəticələrindən biridir.

Rasim Əliyev ölkədə mövcud olan hüquqi nihilizmin, özbaşınalığın, cəzasızlıq mühitinin qurbanıdır. Ədalət mühakiməsi sisteminin mövcud olmaması, ayrı-ayrı təbəqələrin xüsusi imtiyazların verilməsi bu cür acınacaqlı hadisələrin baş verməsinin əsas səbəblərindəndir.

Rasim Əliyevin ölümü ölkədə ümumi cəzasızlıq mühitinin mövcudluğunu, polisin öz funksiyalarını yetirməməsini, səhiyyə sisteminin acnacaqlı vəiyyətdə olduğunu bir daha açkara çıxardı.

Müsavat Partiyası hesab edir ki, Rasim Əliyevin qətlinə görə ilk növbədə bütün bu naqislikləri yaradan Azərbaycan hakimiyyəti cavabdehdir və hakimiyyət indiki idarəçilik sistemi mövcud olduqca belə hadisələr yenə də baş verəcək.

Müsavat Partiyası jurnalist Rasim Əliyevin ailəsinə, dostlarına, yaxınlarına və bütün Azərbaycan xalqına baş sağlığı verir.

Azərbaycan hakimiyyətindən bu cinayət hadisəsinin ciddi araşdırılmasını və günahkarların cəzalandırılmasını tələb edir”.