Vətəndaş cəmiyyəti vəkillərin təqibini pisləyir

Siyasi Məhbusları Monitorinq Mərkəzi son günlər hüquq müdafiəçilərinə və vəkillərə təzyiq faktlarını pisləyib. Xüsusən, təşkilat oktyabrın 14-də DİN-in Mütəşəkkil Cinayətkarlığa qarşı Mübarizə Baş İdarəsində qorxudulmağa çalışılan və xarici pasportunun verilməsindən imtina olunan hüquq müdafiəçisi Oqtay Gülalıyevə təzyiqi pisləyir.

Siyasi məhbusların hüquqlarını müdafiə edən vəkillər Elçin Sadıqov və Fariz Namazlı da təzyiqlə üzləşiblər. Sadıqov da MCMBİ tərəfindən hədələrə və şantaja məruz qoyulub, Namazlıya qarşı isə hücum ittihamı ilə araşdırma başlayıb, baxmayaraq ki, o, özü hücuma məruz qalıb.

Mərkəz öz bəyanatında vəkillərə təzyiqi və onların işinə müdaxiləni qətiyyətlə pisləyərək, son illər bir sıra müstəqil vəkillərin işdən kənarlaşdırıldığını xatırladıb. “Və bu, ölkədə kəskin vəkil çatışmazlığı olduğu bir vaxtda baş verir. Azərbaycanda hər 10 min vətəndaşa cəmi bir vəkil düşür. Bu, postsovet məkanında ən pis göstəricilərdən biridir. Hətta Belarusda hər 5750 nəfərə, Ukraynada isə 1450 nəfərə1 vəkil düşür”, deyə bəyanatda bildirilir.

Hüquq müdafiəçilərinə və vəkillərə təzyiqlə əlaqədar Mərkəz Baş Prokurorluğa müraciət etmək niyyətindədir.

Öz növbəsində, “D18” hərəkatı vəkillər Sadıqov və Namazlıya təzyiqi pisləyib, bu hüquqşünasların təqibinə son qoymağı və onların peşə fəaliyyəti üçün maneələri aradan qaldırmağı tələb edib. -16D-