Vətəndaş Cəmiyyətini Müdafiə Komitəsi Taleh Xasməmmədova qarşı təqiblərə son qoyulmasına çağırıb

Vətəndaş Cəmiyyətini Müdafiə Komitəsi həbsdə olan hüquq müdafiəçisi Taleh Xasməmmədova qarşı təqiblərə son qoyulmamasını pisləyib.

Komitə Penitensiar Xidmət rəhbərliyini T.Xasməmmədovun 13 saylı koloniyada karserdə saxlanmasına son qoyulmasına və ona təcili tibbi yardım göstərilməsinə çağırıb.

Xatırladaq ki, T.Xasməmmədovun həyat yoldaşı Penitensiar Xidmət rəhbərliyinə açıq müraciət edrək həyat yoldaşının müalicə olunmasını xahiş etdikdən sonra fevralın 11-də hüquq müdafiəçisi karserə salınıb.

“Qanun və hüquq” təşkilatının rəhbəri Taleh Xasməmmədov 2015-ci il iyulun 22-də adam döyməkdə ittiham olunaraq üç il müddətinə azadlıqdan məhrum edilib. O, günahı olduğunu inkar edir, cinayət təqiblərinə etiraz olaraq aclıq elan  edib, damarını kəsib. 2015-ci ilin dekabrında Azərbaycan vətəndaş cəmiyyəti nümayəndələrinin hazırladığı siyasi məhbuslar siyahısına daxil edilib.

Bundan öncə 2012-ci il aprelin 20-də Göyçay Rayon Məhkəməsi T.Xasməmmədovu CM-in “Silah və ya silah kimi istifadə edilən alət tətbiq etməklə xuliqanlıq törətmək” və “Hakimiyyət nümayəndəsinə qarşı zorakılıq tətbiq etmək” ittihamları ilə həbs edib.

Ölkə prezidentinin 26 dekabr 2012-ci il tarixli sərəncamı ilə T.Xasməmmədov əfv edilib.

“Siyasi Məhbuslarsız Azərbaycan” İctimai Alyansı qeyd edir ki, T.Xasməmmədov sosial şəbəkələrdə və mətbuatda yerli məmurları ifşa etdiyinə görə təqib olunur.-0-