Vətəndaş cəmiyyətinin nümayəndələri siyasi məhbusların ailələrinə baş çəkiblər

Cümə axşamı Vətəndaş Cəmiyyətini Müdafiə Komitəsinin və “Siyasi Məhbuslarsız Azərbaycan” Alyansının nümayəndələri daha üç siyasi məhbusa – Qorxmaz Camalov, İlkin Rüstəmzadə və Elvin Abdullayevin ailəsinə baş çəkərək onları Novruz bayramı münasibətilə təbrik ediblər.

Qorxmaz Camalov 2013-cü ildə dindarların saxlanmasına etiraz kampaniyası təşkil etdiyinə görə həmin il dekabrın 9-da CM-in 167.2.2.1; 281.2; 283.2.3 maddələri ilə 8 il həbs cəzası alıb.

“Azad gənclik” Vətəndaş Hərəkatının fəalı  İlkin Rüstəmzadə 2014-cü il mayın 6-da CM-in 28, 220.1 maddəsilə (zorakılıq, qiyam, yanğın, əmlakın məhv edilməsi, odlu silahın, partlayıcı maddələrin və partladıcı qurğuların  tətbiqilə, həmçinin hakimiyyət nümayəndəsinə silahlı müqavimət ğöstərilməsi yolu ilə müşayiət edilən kütləvi iğtişaşların təşkilinə hazırlıq və ya həmin iğtişaşlarda iştirak)    8 il azadlıqdan məhrum edilib.

Azərbaycan Xalq Cəbhəsi Partiyası Gənclər Komitəsinin üzvü Elvin Abdullayev 2015-ci il iyunun 3-də şübhəli ittiham üzrə 234.4.3-cü maddə ilə (böyük həcmdə narkotik maddənin dövriyyəsi)  həbs olunub.

Bir gün öncə vətəndaş fəalları üç siyasi məhbus – Fərəc və Sirac Kərimli, Nemət Pənahlı, Məmməd İbrahimin ailəsinə baş çəkiblər.—0--