V.Məhərrəmov: İşığa borcum olmasa da...

Bakı/20.05.17/Turan: Yeni Yasamal ərazisi, Dadaş Bünyadzadə küçəsi 15-dəki hündürmərtəbəli binanın sakinləri binanı tikən şirkət əməkdaşlarının özbaşınalığından şikayət edirlər.

Tanınmış kənd təsərrüfatı mütəxəssisi Vahid Məhərrəmov Turan-a bildirib ki, mayın 18 və 19-u binanın işıqlarını söndürüblər: "Mayın 18-də səhərdən işqları söndürdülər, bir də axşam yandırdılar. Mayın 19-u səhər yenə söndürüblər, saat axşam 5-dir, hələ də işıqları yandırmayıblar. Bu, ilk dəfə deyil. Səbəb də budur ki, bu təzyiq vasitəsilə sakinlərdən qanunsuz pul yığmaq istəyirlər, bu, mənzilin hər kvadrat metrinə görə 25 qəpik pul deməkdir. Elə ki, sakinlər pulu vermək istəmirlər, o zaman yaşlı adamlar elektrik adı ilə gələrək işıqları kəsirlər".

V.Məhərrəmov deyir ki, bu şəxslərin fəaliyyətləri qanunsuzdur, belə ki, bina təhvil verilməyib, dövlət komissiyası bu binanı təhvil götürməyib, 10 ildir ki, sakinlər burada müqavilə əsasında yaşayırlar və onlara xidmət sıfır səviyyəsindədir, bina yanğından mühafizə xidmətilə təmin edilməyib. Onun sözlərinə görə, binada yanğın olub, sakinlər pul toplayıb yanğın olan hissəni təmir ediblər.

V.Məhərrəmov hesab edir ki, problem ondadır ki, binanın idarə edilməsi ilə bağlı yaranan hansısa qurum şəxsi maraqları naminə binanı dövlətə təhvil verməkdə maraqlı deyillər. Onun fikrincə, elə buna görə də bu adamlar qanunsuz olaraq fəaliyyət göstərirlər: "Binada qaz, su, işıqla bağlı sayğaclar qurulub, amma bina təhvil verilməyibsə, bütün bu şəxslərin fəaliyyəti qanunsuzdur".

V.Məhərrəmov deyir ki, o, ayda iki dəfə su pul verməli olur, bir dəfə həmin bu adamlara, ikinci dəfə isə Yasamal rayon su idarəsinə, işığa isə ümumiyyətlə borcu yoxdur, qazdansa ümumiyyətlə istifadə etmir".

Adı çəkilən binanın idarə edilməsi üzrə mənzil istismar sahəsinin (MİS) rəhbəri kimi özünü təqdim edən Qələndər Allahverdiyev qarşı tərəfin dediklərini əsassız adlandırıb. "Binada yalnız bir neçə nəfərin işığı verilməyib ki, onlar da ödənişləri etməyiblər". Amma Q.Allahverdiyev elektrik enerjisini kəsmək hüququnu ona kimin verdiyini izah etməyib və həmin şəxslərin mənzillərinə elektirk enerjisi verilib-verilməyəcəyinə aydınlıq gətirməyib.