Xalid Bağırov Vəkillər Kollegiyasının iradlarını əsassız sayər

Yanvarın 9-da Bakının Nizami Rayon Məhkəməsində hüquqşünas Xalid Bağırovun vəkillik səlahiyyətlərinin dayandırılması barədə iddia üzrə hazırlıq iclası keçirilib.

Xatırladaq ki, dekabrın 10-da Vəkillər Kollegiyasının Rəyasət Heyəti X.Bağırovun vəkillik səlahiyyətlərinin dayandırılması barədə qərar qəbul edib və bununla bağlı məhkəməyə müraciət edib. Buna Şəki Apellyasiya Məhkəməsində REAL hərəkatının lideri İlqar Məmmədovun içi üzrə məhkəmədə X.Bağırovun çıxışı səbəb olub. Belə ki, vəkil məhkəmə sistemini və müxalifətçinin barəsində hökm çıxaran hakim Rəşid Hüseynovu tənqid edib.

Yanvarın 9-da Nizami məhkəməsində X.Bağırov iddianın qanunsuz olmasının tanınması barədə vəsatət qaldırıb. Vəkil qeyd edib ki, Vəkillər Kollegiyasının Rəyasət Heyətinin iddia qaldırmaq səlahiyyəti yoxdur. İddia Vəkillər Kollegiyasının özü tərəfindən irəli sürülə bilər. Bu barədə Turan-a X.Bağırov bildirib. 

Lakin hakim vəsatətə baxmayıb. İş üzrə dinləmələr yanvarın 21-nə təyin edilib.

Vəkil iddianı absurd sayır. Əsasən orada “X.Bağırov davranış qaydalarını pozaraq vəkil nüfuzuna xələl gətirən  hərəkətlərə yol verib”, “vəkil olan şəxs ədalət təcəssümü olmalıdır, lakin o belə olmayıb”, “dövlətçiliyin üzərinə kölgə salıb”, “ədalət mühakiməsinin nüfuzuna zərər vurub” kimi sözlər yazılıb.

Qeyd edək ki, Xalid Bağırov tanınmış vəkildir, bir çox “siyasi” işləri aparıb. O, Leyla Yunus, Hilal Məmmədov, İlqar Məmmədov, NİDA fəalları, Əbdül Abilov və başqalarının vəkili olub.

 2011-ci ildə onun vəkillik fəaliyyəti bir il müddətinə dayandırılmışdı. O, Bakı polisini böhtanda ittiham olunmuşdu. -06B-