Xədicə İsmayılova 3 ay müddətinə həbs oluna bilər

Binəqədi rayon məhkəmə icraçıları jurnalist Xədicə İsmayılova üçün ictimai işləri yerinə yetirəcəyi yer “tapıblar”. 

Ona 6-cı mikrorayonda Əlillərin Bərpa Mərkəzində təmizlik həyata keçirməti təklif ediblər. Lakin İsmayılova bundan imtina edərək, “təxribatdan uzaq olmaq üçün” cəzanın ictimaiyyət üçün açıq yerdə icra olunmasını tələb edir.

Belə ki, o xatırladıb ki, ictimai işlərə cəlb edilmiş gənc fəal Cəmil Hacıyev Binəqədi rayon mənzil-kommunal təsərrüfat idarəsinin binasında döyülüb.

Buna cavabda məhkəmə icraçıları İsmayılovanı ictimai işlərdən imtina edərsə, üç aylıq həbslə hədələyiblər.

Xatırladaq ki, bir müddət əvvəl onun barəsində məhz küçələri süpürmək cəzası çıxarılıb. Lakin böyük bir qrup İsmayılova ilə birlikdə küçələri süpürməyə hazır olduğunu bildirdikdən sonra hakimiyyət bunun siyasi aksiyaya çevriləcəyindən qorxdu və cəzanı ləğv etdi.

İsmayılova yanvarın 26-da Bakıda İsmayıllı sakinləri ilə həmrəylik aksiyasında iştiraka görə 400 manat cərimə olunub. Lakin o, cəriməni ödəməkdən imtina edib. Bundan sonra Binəqədi rayon məhkəməsi cəriməni 220 saat ictimai işlərlə əvəz edib. -03B-